Handbolti

Sérfræðingurinn: Slökkti sáttur á sjónvarpinu

Eiríkur Stefán Ásgeirsson skrifar
Arnar Freyr Arnarsson og Elvar Örn Jónsson í baráttunni við Domagoj Duvnjak í kvöld.
Arnar Freyr Arnarsson og Elvar Örn Jónsson í baráttunni við Domagoj Duvnjak í kvöld. Vísir/EPA

Jóhann Gunnar Einarsson, sérfræðingur Stöðvar 2 Sports, var sáttur þrátt fyrir tap Íslands gegn Króatíu í fyrsta leik liðanna á HM 2019 í handbolta í kvöld. Króatar unnu leikinn, 31-27.

„Þegar ég slökkti á sjónvarpinu þá var ég sáttur,“ sagði hann. „Það er kannski skrýtið eftir 4-5 marka tap en miðað við hvað þetta var langur kafli þar sem við spiluðum vel þá er ekki hægt að fara fram á mikið meira. Þetta landslið var óskrifað blað fyrir mótið og við vorum að spila við eitt besta lið heims.“

Íslendingar spiluðu vel á löngum köflum, eins og Jóhann Gunnar segir, en mistök í lok beggja hálfleikja reyndust okkar mönnum dýrkeypt.

„Sérstaklega í lok leiksins. Þá kemur kannski þetta í ljós það sem hefur verið rætt fyrir mótið, að þetta er ungt lið. Elvar Örn og Ómar Ingi voru mikið að leita til Arons og bíða eftir að hann myndi klára þetta. Það var mikið undir og mikil pressa eftir jafnan leik og það vildi enginn vera í fyrirsögnunum um að hafa farið með leikinn.“

„Maður var fljótur að gleyma því að þetta væri ungt og reynslulítið lið, en það sást þó á lokakaflanum.“

Jóhann Gunnar hrósaði Elvari sérstaklega, hann var að spila sinn fyrsta leik á stórmóti. „Hann var frábær í leiknum. Það glöddust allir yfir hans frammistöðu - kannski fyrir utan Selfyssinga. Ef að Patrekur (Jóhannesson, verðandi þjálfari Skjern) tekur hann ekki með sér til Danmerkur þá eru örugglega mörg önnur lið sem hrifust af frammistöðunni hans í kvöld. Það gæti allt eins farið svo að Elvar verði sóttur í atvinnumennskuna strax í janúar, miðað við þessa frammistöðu.“

Að sama skapi náði Ómar Ingi Magnússon ekki að sýna sitt rétta andlit á hægri vænginum. „Hann þarf að taka meira til sín en hann gerði. Hann hefur verið frábær í Danmörku en náði ekki að gefa stoðsendingu í þessum leik.“

Framliggjandi íslensk vörn erfið

Jóhann Gunnar Einarsson.

Leikstjórnandinn Luka Cindric var lykilmaður í sóknarleik Króatíu að mati Jóhanns Gunnars og íslenska vörnin réði ekki við hann.

„Þetta er einn fljótasti miðjumaður í boltanum í dag. Hann skoraði kannski ekki mikið en bjó til allt fyrir hægri væntinn, þar sem Luka Stepancic skoraði átta mörk. Íslenska vörnin spilaði framarlega í dag sem er sú vörn sem Gummi hefur verið að þróa. Hann hefur ekki haft mikinn tíma með þetta unga lið og gat því ekki búið til mörg varnarafbrigði til að grípa í í þessum aðstæðum.“

„Ólafur Gústafsson er ekki vanur því að spila svona framarlega með sínu félagsliði en hann lenti oft í erfiðri aðstöðu í þessum leik. Þetta var erfitt og ekki við hann að sakast í þessu.“

Markvarslan var kaflaskipt í kvöld. Björgvin Páll var lengi í gang en Ágúst Elí sýndi ágæt tilþrif þegar hann kom inn á í síðari hálfleik.

„Þú þarft almennt ekki marga varða bolta til að hjálpa liðinu. Það er oft nóg að verja nokkra í röð eins og Ágúst gerði þegar hann kom inn á. Þá komst Ísland yfir. Bjöggi fann sig ekki í dag og er örugglega svekktur með það. Hann vildi svara gagnrýninni í dag.“

Aron frábær

Aron Pálmarsson tekur skot í kvöld. Vísir/EPA

Jóhann Gunnar er sáttur sem fyrr segir og bjartsýnni eftir leik en hann var fyrir leikinn.

„Þetta var ekta króatískur seiglusigur og sjálfsagt sá Gummi möguleika á því að fá eitthvað úr þessum leik. Hann spilaði á fáum mönnum og gaf mikið púður í leikinn, sem mun ef til vill koma niður á leiknum gegn Spáni á sunnudag. Það virðist stefna í algeran úrslitaleik gegn Makedóníu um þriðja sætið í riðlinum eins og reiknað var með fyrir mótið.“

Hann hrósaði að lokum Aroni Pálmarssyni, fyrirliða íslenska liðsins í kvöld. Aron skoraði sjö mörk í tíu skotum og gaf fjölda stoðsendinga.

„Alfreð Gíslason skoraði á Aron í viðtali við Vísi fyrir leik að skjóta mikið. Hann sýndi svo sannarlega að hann getur skotið. Hann kom að meira en helmingi marka íslenska liðsins og var einfaldlega frábær.“


Tengdar fréttir

Arnór: Spiluðum frábæran handbolta á köflum

Íslenska karlalandsliðið í handbolta tapaði með fjórum mörkum fyrir því króatíska í fyrsta leik á HM í dag. Arnór Þór Gunnarsson sagði liðið heilt yfir hafa spilað nokkuð vel þó úrslitin séu svekkjandi.

Elvar: Getum unnið hvaða lið sem er

Elvar Örn Jónsson var frábær í sínum fyrsta leik á stórmóti með íslenska karlalandsliðinu í handbolta. Ísenska liðið tapaði með fjórum mörkum fyrir Króatíu.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.