Innlent

Þingmenn búa sig undir umræður um veggjöld

Kristján Már Unnarsson skrifar
Katrín Jakobsdóttir heilsar Eyjólfi Árna Rafnssyni, sem var gestur á þingflokksfundi Vinstri grænna í dag.
Katrín Jakobsdóttir heilsar Eyjólfi Árna Rafnssyni, sem var gestur á þingflokksfundi Vinstri grænna í dag. Stöð 2/Friðrik Þór Halldórsson.
Þingmenn búa sig nú undir umræður um veggjöld en samgönguáætlun, sala ríkisbankanna og átök á vinnumarkaði eru líkleg til að verða stærstu mál Alþingis á næstu vikum. Þrír þingmenn eru enn í leyfi frá þingstörfum vegna hneykslismála. Rætt var við Steingrím J. Sigfússon, forseta Alþingis, í fréttum Stöðvar 2. 

Þótt formlegir þingfundir hefjist ekki fyrr en í næstu viku eru þingstörfin í raun hafin. Þannig funduðu nokkrir þingflokkar í dag og störf þingnefnda fara á fullt á morgun.

Katrín Jakobsdóttir í Alþingishúsinu í dagStöð 2/Friðrik Þór Halldórsson.
Í Alþingishúsinu sáum við Katrínu Jakobsdóttur forsætisráðherra koma til fundar með þingflokki Vinstri grænna. Við ályktuðum að þar væru veggjöld á dagskrá þegar við sjáum að Eyjólfur Árni Rafnsson var kallaður til sem gestur en hann er formaður starfshóps samgönguráðherra um fjármögnun vegaframkvæmda. 

Samgönguáætlun verður einmitt eitt af stóru málunum sem bíða þingsins á fyrstu dögum, að sögn Steingríms J. Sigfússonar, forseta Alþingis, sem rifjar upp að samkomulag hafi tekist fyrir jól um að ljúka afgreiðslu hennar um mánaðamót. Hann nefnir einnig umræðu um Hvítbókina um framtíð fjármálakerfisins, en þar undir er sala ríkisbankanna. 

Forsætisnefnd Alþingis fundaði í dag til að skipuleggja verkefni þingsins framundan. Steingrímur býst við því að þingfundir hefjist með því að forsætisráðherra flytji munnlega skýrslu um það sem er framundan á vettvangi stjórnmálanna.

Frá fundi forsætisnefndar Alþingis í dag.Stöð 2/Friðrik Þór Halldórsson.
„Auðvitað eru margir að horfa til stöðunnar á vinnumarkaði. Það kann að hafa áhrif hér í störfum þingsins ef það kemur til kasta stjórnvalda í þeim efnum,“ segir Steingrímur. 

Svokallað Klaustursmál setti skugga á þingstörfin fyrir jól en forsætisnefnd Alþingis lýsti sig þá vanhæfa til að fjalla um það.

„Það verður rætt núna bæði í forsætisnefnd og síðan á vettvangi formanna þingflokkanna hvernig við komum því máli bara í réttan farveg.“ 

-Hvaða farveg eruð þið að hugsa um? 

„Það verður bara séð til þess að málið gangi sína leið, væntanlega til siðanefndar, eins og búið var að ákveða,“ svarar Steingrímur.

Steingrímur J. Sigfússon, forseti Alþingis.Stöð 2/Friðrik Þór Halldórsson.
Sú óvenjulega staða er uppi að þrír þingmenn eru í leyfi frá þingstörfum vegna hneykslismála, þeir Gunnar Bragi Sveinsson, Bergþór Ólason og Ágúst Ólafur Ágústsson. En munu þeir setjast á þing á ný þegar Alþingi kemur saman í næstu viku? 

„Það er alveg í þeirra höndum. Ég hef engar upplýsingar um það á þessari stundu,“ segir forseti Alþingis.

Hér má sjá frétt Stöðvar 2:

 


Tengdar fréttir

FÍB vill að ráðamenn skili bílasköttum til vegagerðar

Félag íslenskra bifreiðaeigenda óttast að innheimtukerfi vegtolla verði of dýr lausn fyrir örríki eins og Ísland og hvetur ráðamenn frekar til að láta þá skatta, sem þegar eru teknir af bíleigendum, renna til vegagerðar.

Vill selja ríkiseignir fremur en að þyngja álögur á landsmenn

Formaður efnahags- og viðskiptanefndar Alþingis, sjálfstæðismaðurinn Óli Björn Kárason, segir ríkið geta kostað vegagerð með því að selja eignir og kveðst andvígur því að álögur verði þyngdar á landsmenn með nýrri tegund skattheimtu.




Fleiri fréttir

Sjá meira


×