Viðskipti innlent

Að duga eða drepast fyrir Airwaves

Stefán Ó. Jónsson skrifar
Frá Iceland Airwaves árið 2016. Fyrsta hátíðin var haldin árið 1999, fyrir 20 árum síðan.
Frá Iceland Airwaves árið 2016. Fyrsta hátíðin var haldin árið 1999, fyrir 20 árum síðan. Vísir/Andri Marínó
Áætlað er að Iceland Airwaves tónlistarhátíðin hafi verið rekin með 30 milljóna króna tapi í fyrra. Þrátt fyrir hallann má segja að niðurstaðan hafi verið skref í rétta átt, sé rekstrarniðurstaða síðustu hátíðar borin saman við hátíðir áranna 2016 og 2017, sem hvor um sig voru reknar með 60 milljóna tapi. Ísleifur Þórhallsson, framkvæmdastjóri Senu Live sem heldur utan um Iceland Airwaves, segir aðstandendur hátíðarinnar því bjartsýna á að það takist að reka hátíðina á sléttu – sem reynt verður að gera strax á næstu hátíð.

Þrátt fyrir að rekstrarniðurstaða síðustu hátíðar gefi góð fyrirheit, enda helmingi minni taprekstur milli ára, segir Ísleifur að nú sé komið að ögurstund fyrir Iceland Airwaves. Næsta hátíð sé „do or die,“ eins og hann orðar það. Duga eða drepast.

Við þurfum að sýna og sanna að það sé hægt að ná Airwaves á núllið. Að það sé hægt að reka hana. Við höfðum aldrei neinar vonir til þess að hægt væri að reka þetta með hagnaði - en við virkilega verðum að sýna fram á það að hægt sé að halda hátíðina án þess að tapa stórfé

segir Ísleifur.

Til að ná því markmiði hafi aðstandendur hátíðarinnar ráðist í greiningarvinnu. Ætlunin sé að teikna upp aðgerðir og útfærslu næstu hátíðar, sem kynnt verður „innan skamms,“ að sögn Ísleifs. Hann segir þó að ekki ætti að búast við neinni umturnun. Síðasta hátíð hafi verið ákveðin U-beygja enda var þá ráðist í ýmsar stórar aðgerðir; eins og að fækka tónleikastöðum, hætta með Airwaves-dagskrá á sunnudegi og á Akureyri.

Hann áætlar því að boðaðar aðgerðir „muni frekar snúast um að fínpússa það sem við gripum til fyrir síðustu hátíð, sem við teljum að hafi verið jákvætt.“

Ísleifur Þórhallsson, framkvæmdastjóri Senu Live.FRÉTTABLAÐIÐ/EYÞÓR
Ein þessara ákvarðana, sem aftur verður boðið upp á næsta haust, er að greiða ekki svokölluðu „showcase“ tónlistarfólki. Um er að ræða hljómsveitir og tónlistarfólk sem er að stíga sín fyrstu skref í bransanum, hafa í ýmsum tilfellum ekki gefið út mörg lög eða plötur. Ísleifur segist hafa skilning á því að mörgum þyki ósanngjarnt að listamenn fái ekki greitt fyrir vinnu sína. Hann undirstrikar þó mikilvægi Iceland Airwaves fyrir íslenskt tónlistarlíf, hátíðin sé stökkpallur fyrir íslenska listamenn og mikill kostnaður fylgi því að flytja inn erlenda fjölmiðla og „bransafólk“ til landsins. 

Sjá einnig: Airwaves snerist gegn stöðum sem borguðu ekki

„Það er nógu erfitt að reka þessa hátíð fyrir. Það er hreinlega ekki hægt að borga öllum. Það er bara ekki hægt,“ segir Ísleifur. „Við erum alveg reiðubúin að taka þá umræðu, finnist einhverjum að allir eigi að fá borgað fyrir vinnuna sína. Tökum bara umræðuna, með öllum þeim sem eiga hlut að máli. En málið er það að hátíðin hefur ekki efni á því að borga þeim fyrir að koma fram. Það er gríðarleg fjárfesting að koma erlendu bransafólki og fjölmiðlum til landsins. Það kostar stórfé. Það kostar stórfé að útvega hljómsveit 20 mínútur á sviði til að flytja sín lög. Það kostar ekki aðeins að setja upp sviðið og allan búnað, heldur einnig öll kynningin og það að flytja fólk til landsins,“ segir Ísleifur.

Hann segir að þrátt fyrir að ákveðið hafi verið í fyrra að greiða ekki umræddum hljómsveitum hafi engu að síður verið mikil eftirspurn eftir að spila á hátíðinni. „Við erum að gefa þessum hljómsveitum stökkpall til að koma sér á framfæri. Það er gríðarlegur fjöldi sem sækir um það að koma fram og er til í það að fá ekki greitt. Það voru 300 bönd í fyrra sem sóttu um, þar af voru 80 bönd sem voru að stíga sín fyrstu skref.  Þeim finnst einfaldlega mjög mikils virði að fá þetta tækifæri.“

Tónlistardagskráin á Iceland Airwaves er alla jafna fjölbreytt. Til að mynda lék Bjartmar Guðlaugsson fyrir leikskólabörn og foreldra þeirra á síðustu hátíð.Vísir/Vilhelm

Lægra verð til skoðunar

Ísleifur vonar að fólk sýni því skilning að ekki sé hægt að reka Iceland Airwaves með tugmilljóna tapi á hverju ári. „Hátíðin er svolítið sameign okkar allra – við þurfum á hjálp og skilningi að halda,“ segir Ísleifur. Skilningurinn gæti til að mynda falist í því að sætta sig við breytingar á ýmsu sem tíðkast hafi á fyrri hátíðum. „Það eru allir vanir því að fá boðsmiða á Airwaves, allir vanir því að fá alls konar fríðindi á hátíðinni. Við þurfum að vinda ofan af svo mörgu til þess að ná þessu á núllið - til þess að hátíðin lifi.“ 

Þrátt fyrir að fyrrnefndri greiningarvinnu sé ekki lokið segist Ísleifur geta gefið upp að ýmislegt sé til skoðunar. Til að mynda hafi fjöldi hljómsveita á síðustu hátíð verið helst til mikill. „Það voru 240 tónlistaratriði í fyrra, það var svolítið mikið. Það má í raun segja að fjöldinn hafi farið úr böndunum.“ Þá sé einnig verið að kanna hvort hægt verði að bjóða upp á dagspassa á næstu hátíð, sem Ísleifur segir að margir Íslendingar hafi kallað eftir.

„Þá gæti vel verið að við lækkum verðið, þó svo að það hafi verið tap á síðustu hátíð, til að selja fleiri miða,“ segir Ísleifur en ítrekar að greiningarvinnan standi enn yfir og að afrakstur hennar verði kynntur fljótlega. „Í grunninn verður hátíðin þó svipuð og í fyrra. Hún heppnaðist mjög vel og þetta er allt í rétta átt - þó svo að það hafi verið tap.“


Tengdar fréttir






Fleiri fréttir

Sjá meira


×