Leik lokið: Ísland - Japan 25-21 | Erfiður seiglusigur á strákunum hans Dags

Ísland vann sinn annan leik á HM í handbolta í dag þegar liðið fór með 25-21 sigur á Japan. Frammistaða liðsins var ekki góð en mikilvæg stig í höfn.

Íslenska liðið byrjaði leikinn vel og komst í 6-3 eftir tæpar tíu mínútur. Þá tók hins vegar við slæmur kafli hjá Íslandi þar sem það virtist þeim ómögulegt að skjóta boltanum á markið.

Varnarleikurinn opnaðist og seigir leikmenn Japan náðu að jafna í 7-7. Íslenska liðið náði þó að halda þeim japönsku fyrir aftan sig þar til hálfleikurinn var við það að renna út. Japan komst yfir í fyrsta skipti í stöðunni 11-12 þegar þrjár mínútur voru eftir af fyrri hálfleik.

Íslenska liðið átti hins vegar síðasta orðið í fyrri hálfleik og var staðan 13-12 þegar gengið var til búningsherbergja. Þar má búast við að Guðmundur Guðmundsson hafi lesið sínum mönnum pistilinn því þessi leikur mátti alls ekki tapast ætli liðið í milliriðil.

Seinni hálfleikur byrjaði á smá markmannasýningu, Björgvinn Páll Gústavsson og Akihito Kai lokuðu mörkunum og það var ekki skoraði í um fimm mínútur.

Á 41. mínútu fékk Hiroki Shida rautt spjald í liði Japan fyrir að brjóta illa á Stefáni Rafni Sigurmannssyni í hraðaupphlaupi. Ekki viljaverk en ekkert annað í stöðunni fyrir dómarana nema reka hann út af.

Íslenska liðið var með tveggja til þriggja marka forystu megnið af seinni hálfleiknum en Japan gerði áhlaup undir lokinn og minnkaði muninn í 21-20.

Þá tók Guðmundur leikhlé og Ísland skoraði í kjölfarið þrjú mörk í röð og kláraði leikinn. Lokatölurnar urðu 25-21 og sigurinn í höfn en frammistaðan ekki sérstaklega sannfærandi. Íslenska liðið gerði nóg en það þarf betri frammistöðu gegn Makedóníu á morgun þar sem það ræðst hvort Ísland fari í milliriðil.

Nánari umfjöllun, viðtöl við landsliðsmenn, tölfræði og fleira tengt leiknum kemur inn á Vísi síðar í dag.