Handbolti

Utan vallar: Krakkar og karlmenni halda til Kölnar

Tómas Þór Þórðarson í lest fyrir utan Stuttgart skrifar
Hinn 19 ára gamli Gísli Þorgeir Kristjánsson hefur verið áræðinn og óhræddur.
Hinn 19 ára gamli Gísli Þorgeir Kristjánsson hefur verið áræðinn og óhræddur. vísir/getty
„Ég hef verið að pæla í þessum hornamönnum. Þeir standa bara þarna í horninu og bíða eftir því að verða aðalmaðurinn,“ segir Sigurður Már, tökumaður Stöðvar 2 og Vísis, í lest á leiðinni til Kölnar er hann glímir við eyrnabólgu og fylgist með Þýskalandi þjóta framhjá.

Siggi er enginn handboltaheili eins og lesa má en strákarnir okkar hafa náð til hans og nú fagnar hann hverju marki á leikjunum eins og það sé síðasta markið sem skorað verður í íþróttinni. Það er nefnilega þannig að þegar að íslensku landsliði gengur vel þá eru allir með.

Strákarnir okkar hafa náð aftur til þjóðarinnar eftir nokkur döpur stórmót í röð en eins og allir vita er gríðarlega mikilvægt að liðinu gangi vel til að lífga upp á janúar. Það er algjör óþarfi að breyta klukkunni á meðan handboltaliðið er með fast sæti í milliriðlum á stórmótum. Þeir birta upp skammdegið.

Eftir flotta frammistöðu á riðlakeppninni eru krakkarnir og karlmennin í íslenska liðinu mætt til Kölnar þar sem fyrst verður leikið gegn sjálfum gestgjöfum Þýskalands fyrir framan 20.000 manns í einni glæsilegustu íþróttahöll landsins. Nú fer heldur betur að færast fjör í leikinn

Íslenska þjóðin er öll með strákunum okkar.vísir/getty

Erfitt án stiga

Draumur íslenska liðsins er vafalítið að leika um sjöunda sætið og eiga þannig möguleika á því að vera með í Ólympíuumspilinu fyrir ÓL 2020 í Tokýó. Það mun þó reynast erfitt fyrst okkar menn fóru stigalausir í milliriðilinn.

Ísland hefur leik án stiga í fimmta sæti af sex liðum og þarf að skilja eitt lið eftir fyrir aftan sig til að spila um sjöunda sætið. Þýskaland er í fínni stöðu með þrjú stig og Spánverjar eru með tvö og eiga eftir leik gegn Brasilíu sem Ísland mætir á miðvikudaginn.

Ef Ísland ætlar sér að spila um sjöunda sætið verður leikurinn annað kvöld gegn Þýskalandi að vinnast en það er ekkert lítil bón. Þeir verða með allt húsið á bak við sig og eru líka með gott lið sem ætlar sér stóra hluti á mótinu.

Það er erfitt að hlaða pressu á íslensku strákana fyrir morgundaginn en þeir vita að tap á morgun þýðir að 9.-12. sætið verður líklega staðreyndin í lok móts.

Fyrirliðinn hefur verið frábær í sínu hlutverki.vísir/getty

Gamlir en góðir

Ungu strákarnir hafa fengið mikla athygli á mótinu og það réttilega. Elvar Örn Jónsson hefur spilað varnarleikinn nánast fullkomlega og Gísli Þorgeir átti stórkostlega innkomu í sóknarleikinn á móti Makedóníu í gær. Þessir strákar fæddir 1997 og 1999.

Reynsluboltarnir hafa þó staðið fyrir sínu og rúmlega það. Arnór Þór Gunnarsson er markahæsti maður liðsins og hefur sýnt allt sem góður Malmquist hefur að bera, Ólafur Guðmundsson er búinn að vera frábær í sínu hlutverki og Björgvin Páll Gústavsson hefur blásið á efasemdaraddirnar með flottri frammistöðu í síðustu leikjum.

Það sem mér hefur þótt skemmtilegast er að sjá hvernig Aron Pálmarsson hefur tekið að sér leiðtogahlutverkið með stæl. Hann virðist njóta þess að spila með þessu liði og þessum ungu strákum sem hann sagði eftir leik í gær að fylltu sig svo mikilli von.

Aron er alltaf að í leikjunum og ekki bara að skora. Það sem þeir sem heima sitja sjá ekki er að hann er alltaf að spjalla við samherja sína og ráðleggja þeim eitthvað fyrir næstu sókn og vörn, hann spjallar mikið við Guðmund og virðist fara með skilaboð hans til liðsins og svo hjólar hann í dómara og mótherja sem eru vondir við strákana sína. Þetta er hans lið núna. Hann veit það og er að sinna foringjahlutverkinu eins og kóngur.

Stór stund í Köln á morgun.vísir/getty

Njótið morgundagsins

Ef ég væri meira miðaldra væri ég líklega með ristað brauð með avókadó í hönd og myndi segja strákunum bara að "slagga og njódda og liffa." Okkar menn eru búnir að ná aðaltakmarkinu og þurfa nú að setja sér ný markmið.

Framhaldið verður erfitt. Mjög erfitt. En, það verður líka skemmtilegt. Mjög skemmtilegt. Íslensku guttarnir fá að upplifa eitthvað sem ekki allir fá á sínum ferli; að spila við Þýskaland á stórmóti í risaleik í Þýskalandi. Stemning á handboltaleikjum verður ekki betri.

Íslenska liðið hefur nákvæmlega engu að tapa á morgun sem er fín staða að vera í. Pressan er öll á þýska liðinu sem má ekki tapa. Þetta er leikur sem það ætlar að vinna á leið sinni í undanúrslitin og verða heimamenn því vonandi þjakaðir af spennu.

Þó að Íslandi hafi allt að vinna í leiknum þýðir ekki að menn geta bara slakað á og horft á stemninguna upp í stúku. Það er vonandi að þetta unga lið sé enn þá glorhungrað og langi að eyðileggja þýsku veisluna annað kvöld. Þjóðin er allavega klár í gott laugardagskvöld í boði strákanna okkar.


Tengdar fréttir

Stóðust prófið og fara til Kölnar

Strákarnir okkar komust í milliriðlana á HM í handbolta með 24-22 sigri á Makedóníu í gær. Eftir stirða spilamennsku í fyrri hálfleik reyndust taugar íslenska liðsins sterkari á lokakaflanum og tókst að landa sigrinum.

Norðurlöndin eiga bestu markverðina á HM

Þrír bestu markverðir riðlakeppni HM í handbolta í Þýskalandi og Danmörku koma allir úr landsliðum frá Norðurlöndum. Niklas Landin er eini markvörðurinn sem varði fleiri skot í riðlakeppninni en íslenski landsliðsmarkvörðurinn Björgvin Páll Gústavsson.




Fleiri fréttir

Sjá meira


×