Fótbolti

Stelpurnar okkar mæta Kanada og Skotlandi á Algarve

Óskar Ófeigur Jónsson skrifar
Íslenska kvennalandsliðið syngur þjóðsönginn fyrir leik á Algarve mótinu í fyrra.
Íslenska kvennalandsliðið syngur þjóðsönginn fyrir leik á Algarve mótinu í fyrra. Vísir/Getty

Íslenska kvennalandsliðið hefur nú fengið að vita með hvaða þjóðum liðið er með í riðli í Algarve bikarnum sem hefst í lok febrúar en þetta er í fyrsta sinn sem liðið spilar á þessu sterka árlega æfingamóti undir stjórn nýja landsliðsþjálfarans, Jóns Þórs Haukssonar.

Íslensku stelpurnar eru samt að taka þátt í Algarve bikarnum þrettánda árið í röð en íslenska liðið hefur ekki misst af mótinu frá og með árinu 2007. Íslenska landsliðið var síðan einnig með 1996 og 1997.

Sú breyting hefur orðið á mótinu að lið spila nú þrjá leiki í stað fjögurra. Þetta er gert til að minnka leikjaálag á þeim stutta tíma sem mótið fer fram á. Þrjú lið skipa því hvern riðil á mótinu sem fer fram 27. febrúar til 6. mars.

Ísland er í riðli með Kanada og Skotlandi en báðar þessar þjóðir eru á leiðinni á HM í Frakklandi næsta sumar. Kanada (5. sæti) er sautján sætum ofar en Ísland á FIFA-listanum en þær skosku (20. sæti) eru tveimur sætum ofar en Ísland (22. sæti).

Ísland hefur aðeins einu sinni áður mætt Kanada, en það var einmitt í Algarve bikarnum árið 2016. Sá leikur endaði með 1-0 sigri Kanada.

Skotland hefur hins vegar verið tíu sinnum andstæðingur Íslands til þessa. Ísland hefur unnið fimm leikjanna, tveir hafa endað með jafntefli og Skotar hafa þrisvar staðið uppi sem sigurvegarar.

Þetta verður samt tólfti leikur þjóðanna og sá annar á stuttum tíma. Liðin mætast nefnilega einnig 21. janúar næstkomandi í vináttuleik á La Manga, Spáni.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.