Innlent

Fylgistap skiljanleg viðbrögð

Sunna Sæmundsdóttir skrifar
Fylgishrun Miðflokksins sem birtist í nýrri skoðanakönnun eru skiljanleg viðbrögð fólks við fréttum síðustu daga að sögn formanns Miðflokksins. Stjórnskipunar- og eftirlitsnefnd Alþingis mun funda um meintan sendiherrakapal sem greint var frá á Klaustursupptökunni.

Samkvæmt nýrri könnun sem Zenter framkvæmdi fyrir Fréttablaðið  myndi Miðflokkurinn ekki ná manni inn á þing ef kosið yrði í dag. Flokkurinn mælist þar einungis með rúmlega fjögurra prósenta fylgi samanborið við tæplega 11 prósenta fylgi í síðustu alþingiskosningum.

Formaður Miðflokksins segir þetta ekki koma á óvart og túlkar það ekki sem ákall um breytingar.

„Ég held að þetta séu eðlileg viðbrögð við umræðunni síðustu daga og mjög skiljanleg viðbrögð," segir Sigmundur Davíð Gunnlaugsson.

Þér finnst ekkert ástæða til þess að bregðast við þessu neitt sérstaklega?

„Ef ég hefði alltaf brugðist við könnunum þegar þær birtast, sama um hvað þær eru, hefði ég mjög oft lent í mótsögn við sjálfan mig og ekki komist neitt áfram. Maður þarf að líta á hlutina til lengri tíma."

Anna Kolbrún Árnadóttir, þingmaður Miðflokksins og einn sexmenninganna á Klausturbar, hefur ákveðið að segja ekki af sér en hafnaði viðtali við fréttastofu um málið í dag.

Stjórnskipunar- og eftirlitsnefnd hefur ákveðið að kalla þá Sigmund, Gunnar Braga Sveinsson, Guðlaug Þór Þórðarson og Bjarna Benediktsson, á fund vegna umræðna um meintan sendiherrakapal sem heyrast á upptökunni.

Guðlaugur sagði í yfirlýsingu í dag að umleitanir sem þessar væru alvanalegar en tók fyrir að Gunnar Bragi ætti inni greiða. Sigmundur segir að Bjarni hafi ekki setið fundinn til að beita þrýstingi heldur til að bera vitni um kosti Gunnars Braga.

Halldóra Mogensen, þingmaður Pírata.
„Hann var ekki að sjá um greiðslu á einhverju loforði. Hann einfaldlega gaf þau skilaboð að Gunnar Bragi væri með mikilvæga reynslu og að hann þekkti hann úr ríkisstjórninni. Það ætti að virða það við hann en ekki neitt annað," segir Sigmundur.

Hann segir orðfæri sambærilegt því sem heyrist á Klaustursupptökunum lengi hafa viðhafst á þingi og er tilbúinn til þess að greina ítarlega frá því fyrir siðanefnd sem hefur komið saman vegna málsins. 

„Fyrst að siðanefnd auglýsir eftir upptökum þá vænti ég þess að hún muni þiggja þær upptökur sem berast af því hvernig þingmenn bera sig í einkasamtölum."

Hefur þú heyrt slíkar upptökur?

„Já".

Þingmenn kannast ekki við orðfærið. 

„Ég hef aldrei heyrt neitt viðlíka. Hvorki fyrr né síðar," segir Helga Vala Helgadóttir, þingmaður Samfylkingar. 

„Ef hann vill meina að hann hafi horft á mörg svona ógeðsleg samtöl, þá má hann bara benda á það fólk sem hefur hagað sér svona, og hætta að ýja endalaust að því og láta okkur öll liggja undir grun með þessu ógeði sínu," segir Þórhildur Sunna Ævarsdóttir, þingmaður Pírata.

„Mér er bara hugsað; margur heldur mig sig. Ég held að þetta segi bara meira um Sigmund og fólkið sem hann umkringir sig með. Það er oft þannig að maður heldur að allir séu eins og maður er sjálfur," segir Halldóra Mogensen, þingmaður Pírata.

„Ég held að í spjalli þingmanna sín á milli séu hlutirnir í allt öðru og miklu betra lagi og alls ekki í neinni líkingu við þetta," segir Logi Einarsson, þingmaður Samfylkingar.

„Ef að þetta er algengt held ég að það sé ennþá meiri ástæða til þess að stíga niður fæti jafn harkalega og hefur verið gert og verður vonandi gert til þess að stoppa þetta og uppræta," segir Hanna Katrín Friðriksson, þingmaður Viðreisnar.


Tengdar fréttir

Íbúum á Klaustri svíður umræðan um Klaustur

Vinsamlega takið tillit til okkar hér á Klaustri því við tölum ekki svona um annað fólk og talið um KlausturBARmálið og KlausturBARþingmennina, það getur ekki verið svo erfitt að bæta BAR aftan við Klaustur , enda skal rétt vera rétt“, segir Anna Harðardóttir sem er búsett rétt við Klaustur í Skaftárhreppi.

Miðflokkurinn næði ekki manni inn

Ný könnun Zenter fyrir Fréttablaðið og frettabladid.is sýnir Miðflokkinn með 4,3 prósenta fylgi og er gerð eftir að Klaustursmálið komst í hámæli.




Fleiri fréttir

Sjá meira


×