Innlent

Zúistum fækkaði hlutfallslega mest

Fornminjar frá samfélagi Súmera. Forsvarsmenn Zuism halda því fram að félag þeirra byggist á átrúnaði á forna guði þeirra.
Fornminjar frá samfélagi Súmera. Forsvarsmenn Zuism halda því fram að félag þeirra byggist á átrúnaði á forna guði þeirra. Vísir/Getty

Félagsmönnum í trúfélaginu Zuism hefur fækkað um tæp sextán prósent undanfarna tólf mánuði en það er hlutfallslega mesta fækkunin hjá nokkru skráðu trúfélagi. Á sama tíma fækkaði um rúmlega 2.400 manns í Þjóðkirkjunni, um 1%.

Samkvæmt tölum Þjóðskrár Íslands voru 306 færri félagar skráðir í Zuism 1. desember borið saman við sama dag í fyrra, það er 15,8% fækkun. Sú dagsetning hefur sérstaka þýðingu því sóknargjöld sem ríkið veitir trú- og lífsskoðunarfélögum eru ákveðin út frá fjölda félaga 1. desember.

Mest fjölgaði í kaþólska söfnuðinum og lífsskoðunarfélaginu Siðmennt á árinu. Fjölgun kaþólikka nam 3,8% en í Siðmennt fjölgaði um 23,5%. Í báðum tilfellum fjölgaði félögum um rúmlega fimm hundruð manns. Hlutfallslega mest fjölgun var í Stofnun múslima á Íslandi. Félögum í því félagi fjölgaði um 105 eða 122,1%. Nú er 191 félagi í Stofnun múslima.

Þá fjölgaði þeim sem eru skráðir utan trú- og lífsskoðunarfélaga um 2.221 á árinu, um 9,9%.

Óljóst með starfsemi Zuism

Vísir hefur fjallað töluvert um trúfélagið Zuism og aðstandendur þess undanfarnar vikur. Tveir bræður sem þekktir hafa verið í fjölmiðlum sem Kickstarter-bræður stofnuðu félagið við þriðja manna árið 2013 og fengu skráð sem trúfélag hjá innanríkisráðuneytinu. Sérstakur saksóknari rannsakaði báða bræðurna vegna meintra gjaldeyrisbrota frá 2013. Annar þeirra sakfelldur fyrir að hafa svikið tugi milljóna króna út úr fjórum einstaklingum fyrir skömmu.

Sýslumaður hugðist afskrá félagið þar sem það hafði ekki skila ársskýrslum árið 2015. Hópur sem var ótengdur upphaflegum stofnendum Zuism gerði þá tilkall til félagsins og laðaði á fjórða þúsund manns að því með loforði um að endurgreiða félögum sóknargjöld sín sem einhvers konar mótmæli gegn lagaramma trú- og lífsskoðunarfélaga.

Þegar ljóst var að félagið ætti von á tugum milljóna króna frá ríkinu steig Ágúst Arnar Ágústsson, einn upphaflegra stofnenda félagsins, fram og krafðist þess að yfirráð sín yfir félaginu og fjármununum yrðu staðfest. Innanríkisráðuneytið staðfesti hann sem forstöðumann í fyrra og fékk félagið þá greiddar rúmar 50 milljónir króna sem Fjársýsla ríkisins hafði haldið eftir á meðan skorið var úr um yfirráð í félaginu.

Óljóst er þó hversu umfangsmikil starfsemi Zuism er. Engin starfsemi á vegum þess fór nokkru sinni fram að Nethyl þar sem það er enn með skráð lögheimili. Ágúst Arnar, sem tók upp loforð hópsins sem hann deildi við um forráð í félaginu, hefur haldið áfram að auglýsa eftir umsóknum um endurgreiðslu sóknargjalda en hefur ekki viljað greina frá hversu margir félagar hafi fengið þau endurgreidd eða hversu stór hluti sóknargjaldanna hafi verið endurgreiddur.

Ekki hefur náðst í Ágúst Arnar eða aðra aðstandendur félagsins í tengslum við umfjallanir Vísis undanfarnar vikur. Þrátt fyrir fækkunina hjá Zuism er félagið enn eitt stærsta trúfélag landsins og á áfram von á tugum milljóna króna frá ríkinu í formi sóknargjalda á næsta ári.


Tengdar fréttir

Zúistar fá tugi milljóna frá ríkinu en finnast hvergi

Að óbreyttu fær trúfélagið Zuism rúmar 20 milljónir króna frá ríkinu í formi sóknargjalda á næsta ári. Félagið virðist húsnæðislaust, með takmarkaða starfsemi og ekki næst í forsvarsmenn þess.

Kickstarter-bróðir fékk á aðra milljón úr Tækniþróunarsjóði

Ágúst Arnar Ágústsson var til rannsóknar vegna fjársvika á sínum tíma og Kickstarter-söfnun hans og bróður hans fyrir vindmylluverkefni var stöðvuð. Nú hefur hann fengið opinberan styrk fyrir nýsköpunarverkefni sem líkist öðru sem bræðurnir söfnuðu fyrir.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.