Innlent

Íslendingur í París lokaðist inni vegna mótmæla „gulvestunga“

Kristín Ýr Gunnarsdóttir og Margrét Helga Erlingsdóttir skrifa
Hildur Þórðardóttir lyfjafræðingur markaðsstjóri var í verslunarleiðangi í Parísarborg þegar hún lokaðist inni á bar, upplifði sársaukann sem fylgir táragasi og varð vitni að stærstu mótmælum fjöldahreyfingarinnar sem kennir sig við gul öryggisvesti.

Laugardagurinn í París einkenndist af hörðum átökum óeirðarlögreglunnar og mótmælenda. Skemmdarverk voru unnin víðs vegar um borgina og lögreglan beitti táragasi.

Hildur dvelur um helgina hjá vinkonu sinni sem býr í lítilli hliðargötu við breiðgötuna Champs-Elysees. Þrátt fyrir að flestir kaupmenn hafi skellt í lás í gær til að koma í veg fyrir innbrot og skemmdir vegna mótmælanna fundu þær veitingastað sem var opinn.

Þær pöntuðu sér kampavín og osta og voru búnar að vera á veitingastaðnum í hálftíma þegar járnhurð sígur niður og gestirnir lokast inni á veitingastaðnum.

Tæplega 17.00 mótmælendur voru handteknir í mótmælum gulvestunga í Frakklandi í gær og 1.220 manns eru enn í haldi lögreglu. Þetta var fjórði laugardagurinn í röð sem mótmælin eru haldin en gærdagurinn einkenndist af hörðum átökum óeirðarlögreglu og mótmælenda.Vísir/AP
Skyndilega virðist reykur koma frá loftræstikerfinu sem reyndist síðan vera táragas.

„Við héldum kannski að þetta væri reykur sem kæmi utan frá en svo byrjar fólk að taka fyrir vitin; munn og augu og setja treflana upp og við spyrjum okkur hvað sé í gangi.“

Það var þó ekki um að villast þegar áhrif táragassins komu fram.

„Okkur byrjar að svíða í munninum og öndunarveginum og svo byrjar fólk að panikka þarna inni og allir álpast innst inn á veitingastaðnum og frá hurðinni og spyrja hvernig þeir komist út.“

Hildur og vinkona hennar voru fastar inni á veitingastaðnum í hálftíma þar til nokkrir gestir vildu ólmir komast út. Kona sem vann á veitingastaðnum sagði að hægt væri að komast út í gegnum eldhúsið bakdyramegin og ákváðu þær að láta slag standa enda var stutt að ganga heim.

Þegar þær komust loks út af veitingastaðnum og virtu fyrir sér umhverfið brá þeim.

„Þetta var eins og í Handmaid's tale. Þetta var bara svo dautt. Það var margt fólk og allir voru í þessum gulu vestum en þetta var allt eitthvað svo sorglegt. Allt var lokað og búið að brjóta glugga og margir búðareigendur búnir að setja spónarplötur fyrir gluggana,“ segir Hildur sem lýsti París í mótmælaham sem draugabæ.

„Við ætluðum fyrst að labba að Champs Elysees og kíkja hvernig þetta var en það var bara allt í reyk og svo finnur maður bara að þetta er ekki reykur, þetta er táragas og maður getur ekkert gert. Það er úði í loftinu og leggst allt á þig, í augu og nef og svona og manni byrjar bara aftur að svíða í augunum og lungunum og þá ákváðum við að hætta að forvitnast og drífa okkur bara heim,“ segir Hildur.

Hildur og vinkona hennar urðu vitni að einum stærstu mótmælum sem haldin hafa verið. Hún heyrði sprengjuhvelli, sírenuvæl og í þyrlunni sem sveimaði fyrir ofan.

„Maður er ótrúlega varnarlaust. Þetta var mjög óþægileg upplifun“

Tæplega 1.700 mótmælendur voru handteknir og 1.220 eru enn í haldi lögreglu. Í upphafi beindust mótmælin að hækkuðum álögum á eldsneyti og var spjótum einkum beint að Frakklandsforseta. Mótmælin hafa aftur á móti undið upp á sig og kröfurnar þróast út í almenna óánægju með efnahagsstefnu ríkisstjórnar forsetans.

Mótmælendur krefjast þess að forsetinn segi af sér en hann er sagður hafa í hyggju að ávarpa mótmælendur á næstu dögum.


Tengdar fréttir

Mikill viðbúnaður fyrir mótmælin í dag

Mótmælendur sem kalla sig Gulu vestin ætla að halda áfram að mótmæla ríkisstjórn Emmanuels Macron jafnvel þó að hann hafi lúffað fyrir þeim með skatta á eldsneyti í vikunni.




Fleiri fréttir

Sjá meira


×