Innlent

Björgun Fjordvik „besta gjöf sem ég hef fengið“

Sighvatur Jónsson skrifar
Jóni Péturssyni hafnsögumanni létti mikið þegar tókst að draga flutningaskipið Fjordvik á flot í gær. Hann var um borð í skipinu þegar það strandið og hefur tekið atvikið mjög nærri sér. Jón má vitaskuld ekki tjá sig um málið fyrr en eftir sjópróf sem fara fram næstu daga.

„Já, þetta er mikill léttir, mikill léttir. Þetta er eiginlega bara besta gjöf sem ég hef fengið, að losna við hann þarna. Svo er bara vonandi að allir komist heilir heim. Þetta er viss áhætta sem er verið að taka,“ sagði Jón þegar hann horfði á Fjordvik losna frá grjótgarði Helguvíkurhafnar.

 

Jón tók þátt í björgunaraðgerðum í Helguvík. Hér horfir hann að Fjordvik í grjótgarðinum frá hafnsögubátnum Auðuni sem hann stýrði í gær.Vísir/Sighvatur

Hugsaði mikið til félaga síns í Fjordvik

Við björgunaraðgerðir í Helguvík í gær sigldi Jón hafnsögubáti Reykjaneshafnar, Auðuni. Hann sagðist ekki hafa getað setið aðgerðalaus heima. Hans heitasta ósk var sú að Fjordvik yrði losað af strandstað.

Jón hugsaði mikið til samstarfsfélaga síns, Karls Óskarssonar hafnsögumanns, sem var um borð í sementsflutningaskipinu í gær. Allt gekk að óskum og Fjordvik var komið inn í Keflavíkurhöfn um tveimur tímum eftir að tókst að losa það af strandstað rétt eftir klukkan sjö í gærkvöldi.




Fleiri fréttir

Sjá meira


×