Tónlist

Nostalgísk stemning í öndvegi á 20 ára afmæli Iceland Airwaves

Margrét Helga Erlingsdóttir skrifar
Í vikunni fagna aðstandendur hátíðarinnar tuttugu ára afmæli hennar. Af því tilefni hefur verið ákveðið að hátíðin verði með örlítið breyttu sniði í ár til að votta upphafsárum hátíðarinnar virðingu.
Í vikunni fagna aðstandendur hátíðarinnar tuttugu ára afmæli hennar. Af því tilefni hefur verið ákveðið að hátíðin verði með örlítið breyttu sniði í ár til að votta upphafsárum hátíðarinnar virðingu. Timothée Lambrecq/Ómar Smith

Opinn hugur og mátulegt skipulag er gott veganesti fyrir Iceland Airwaves tónlistarhátíðina sem hefst formlega á morgun að mati Önnu Ásthildar Thorsteinsson, kynningarstjóra hátíðarinnar.

Í vikunni fagna aðstandendur hátíðarinnar tuttugu ára afmæli hennar. Af því tilefni hefur verið ákveðið að hátíðin verði með örlítið breyttu sniði í ár til að votta upphafsárum hátíðarinnar virðingu.

Nostalgísk stemning

Á fyrstu árum Iceland Airwaves var áhersla lögð á að gestir hátíðarinnar ættu að geta uppgötvað sem mest af nýrri tónlist með því að rölta á milli smærri tónleikastaða og láta koma sér skemmtilega á óvart.

Síðustu ár hefur það færst í aukana að tónleikahaldið hafi færst yfir í tónleika-og ráðstefnuhúsinu Hörpu en sumir hafa saknað hugmyndafræðinnar sem var í forgrunni á upphafsárum hátíðarinnar og þykir heillandi að rölta á milli skemmtistaða og láta koma sér á óvart.

Anna Ásthildur segir að í ár verði aðeins notast við einn sal í Hörpu, Flóa, til að ýta undir hina „nostalgísku stemningu“ á meðal tryggra hátíðargesta Iceland Airwaves á tuttugu ára afmæli hátíðarinnar.
 

Nýir rekstraraðilar og nýjar áherslur

Þetta er þó ekki það eina sem verður með breyttu sniði í ár því þetta er í fyrsta sinn sem Sena Live sér um rekstur hátíðarinnar en viðburðarfyrirtækið tók yfir rekstur hátíðarinnar í byrjun árs.

Anna Ásthildur segir að með nýjum aðilum komi nýjar og ferskar áherslur en bætir þó við að hátíðargestir þurfi ekki að kvíða því að um umfangsmiklar breytingar verði að ræða.

Tónlistarhátíðin hefur frá upphafi verið mikilvægur stökkpalllur fyrir íslenskt tónlistarfólk. Alexander Matukhno

Umfangsminni hliðardagskrá

Það sem helst verði öðruvísi er að svokölluð Off-venue dagskrá, hliðardagskrá hátíðarinnar, verður umfangsminni en undanfarin ár auk þess sem nýir viðburðir innan hátíðarinnar verði kynntir til sögunnar eins og jóga „reif“, sundteiti í Sundhöll Reykjavíkur og hljóðritun tónleika á vínyl plötur.

Anna Ásthildur segir að hátíðin hafi ekki breyst neitt svakalega mikið síðan hún hóf göngu sína, aðalmarkmiðið sé enn þá að vera stökkpallur fyrir íslenskt tónlistarfólk, en það sem hafi aftur á móti breyst á þessum tíma sé rekstrarumhverfi tónlistargeirans.

Fleiri tónlistarhátíðir eru haldnar á Íslandi og fólk nálgast tónlist með allt öðrum hætti en það gerði fyrir tveimur áratugum með hjálp veraldarvefsins.
 

Stífar æfingar fyrir uppskeruhátíð

Fjölmargir erlendir tónlistarblaðamenn sækja hátíðina á hverju ári og gera íslensku tónlistarsenunni góð skil. Anna Ásthildur segir að undanfarið hafi íslenskt tónlistarfólk æft stíft fyrir þessa uppskeruhátíð sem hátíðin sannarlega er.

Sjálf segist Anna Ásthildur vera spenntust að sjá Emmsjé gauta, Between Mountains og Ólaf Arnalds, að öðrum ólöstuðum.

Hún mælir með því að tónleikagestir mæti á hátíðina með opnum hug til að uppgötva nýja tónlist. Varhugavert sé að skipuleggja sig um of en bætir við að Iceland Airwaves smáforritið sé gott til að halda utan um „hóflegt“ skipulag.

Ennþá eru til eitthvað af miðum en rúmlega 240 hljómsveitir frá tæplega 40 þjóðlöndum spila á hátíðinni.


Tengdar fréttir

Dagskráin á Airwaves með jafnt kynjahlutfall

Iceland Airwaves hátíðin hefur í mörg ár verið sótt af jafnmörgum konum og körlum og í ár mun þetta endurspeglast á sviðinu; kynjahlutfall listamannanna sem spila og syngja á hátíðinni er jafnt.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.