Lífið

Góða systir kveður: „Ég hef hvorki tíma né þörf fyrir að skamma fullorðna einstaklinga“

Margrét Helga Erlingsdóttir skrifar
Þórunn stofnaði hópinn í desembermánuði árið 2015 með þann tilgang að leiðarljósi að hópurinn yrði vettvangur þar sem konur gætu staðið saman og sýnt hver annarri skilning og virðingu þrátt fyrir ólíkar skoðanir og viðhorf.
Þórunn stofnaði hópinn í desembermánuði árið 2015 með þann tilgang að leiðarljósi að hópurinn yrði vettvangur þar sem konur gætu staðið saman og sýnt hver annarri skilning og virðingu þrátt fyrir ólíkar skoðanir og viðhorf. Vísir

Þórunn Antonía Magnúsdóttir, söngkona og stjórnandi reglulegra karíókíkvölda á Sæta svíninu, hefur ákveðið að loka vinsæla Facebook hópnum Góðu systur en tæplega fimmtíu þúsund konur eru í hópnum.

Þórunn stofnaði hópinn í desembermánuði árið 2015 með þann tilgang að leiðarljósi að hópurinn yrði vettvangur þar sem konur gætu staðið saman og sýnt hver annarri skilning og virðingu þrátt fyrir ólíkar skoðanir og viðhorf.

Í viðtali hjá Íslandi í dag þegar Þórunn Antonía var nýbúin að stofna hópinn sagði hún að konur eigi að vera góðar við aðrar konur.

Vill að konur standi saman

„Mig langaði að stofna hóp þar sem færu fram jákvæð samskipti, jákvæðar fréttir og jákvæð uppbygging.“

Facebook hópurinn vakti strax heimsathygli ekki síst vegna þess gífurlega fjölda sem gekk í hópinn en fimmtíu þúsund konur skráðu sig í hópinn á fyrstu þremur dögunum.

Konurnar í Facebook hópnum hafa ekki látið sér það nægja að tala vel um konur á síðunni því þær hafa ítrekað notað sameiningarkraftinn til að safna peningum fyrir góðan málstað.

Fréttablaðið/Anton

Ástæðan fyrir því að Þórunn Antonía hefur ákveðið að loka hópnum er sú að hún segist því miður sjá meira af neikvæðum innleggjum á síðunni heldur en jákvæðum að undanförnu sem er að sjálfsögðu ekki í anda tilgangs hópsins.

Þess ber einnig að geta að skömmu eftir stofnun Góðu systur var annar Facebook hópur stofnaður til höfuðs hinni góðu sem hét Vonda systir.

„Ég hef hvorki tíma né þörf fyrir að skamma fullorðna einstaklinga fyrir að fara ekki eftir reglum hópsins því ég kýs að eiga frekar samskipti við fólkið í mínum raunheimi sem skiptir mig í alvöru máli,“ skrifar Þórunn Antonía í kveðjubréfi til kvennanna í hópnum.

Mikil vinna að vera umsjónarkona hópsins

Að vera umsjónarkona svona fjölmenns Facebook hóps er heilmikil sjálfboðavinna. Þórunn Antonía segir að margir hópmeðlimir hafi ekki áttað sig að fullu á vinnunni sem liggur á bak við hópinn. Þrátt fyrir að hún hafi fengið hjálp við að stýra hópnum hafi það samt ekki verið nóg.

Þórunn Antonía segist þó að sjálfsögðu ekki vera hætt að vera „góð systir“ þrátt fyrir lokun hópsins.

Hún þakkar þá öllum þeim fjölskyldum sem leituðu til hópsins í neyð sem og öllum þeim konum sem söfnuðu fyrir góðum málefnum.

„Ég vil taka það fram að ég elskaði þetta ferli og það veitti mér innsýn í heim kvenna, samskipti, vináttu og allt þar fram eftir götunum sem ég mun nýta mér stórkostlega í næstu ævintýrum,“ skrifar Þórunn Antonía.

Ekki náðist í Þórunni Antoníu við vinnslu þessarar fréttar.


Tengdar fréttir

Góða systir vekur heimsathygli

Þórunn Antonía Magnúsdóttir stofandi facebook síðunnar Góða systir var valin ein af sjö konum sem Facebook Stories vildu fjalla um fyrir alþjóðlegan baráttudag kvenna.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.