Innlent

Tveir Ís­lendingar í haldi í Ástralíu grunaðir um stór­felldan fíkni­efna­inn­flutning

Sunna Kristín Hilmarsdóttir skrifar
Áströlsk yfirvöld birtu þessar myndir í tengslum við málið en virði efnanna er um 2,5 milljónir ástralskra dollara.
Áströlsk yfirvöld birtu þessar myndir í tengslum við málið en virði efnanna er um 2,5 milljónir ástralskra dollara. ástralska tollgæslan
Tveir Íslendingar eru í haldi í Ástralíu eftir að mikið magn af kókaíni, alls 6,7 kíló, fundust í ferðatösku annars þeirra á alþjóðaflugvellinum í Melbourne sem og á hótelherbergi þar sem hinn hafði dvalið.

Frá þessu er greint á vef ástralska miðilsins Herald Sun og vitnað í áströlsku alríkislögregluna en á vef áströlsku tollgæslunnar segir að mennirnir hafi verið handteknir á mánudag.

Annar þeirra er 25 ára gamall og var handtekinn á flugvellinum eftir að tollverðir fundu fjögur kíló af kókaíni falin í ferðatösku hans. Var maðurinn á leið frá Hong Kong inn til Ástralíu. Hann hefur verið úrskurðaður í gæsluvarðhald til 13. febrúar á næsta ári.

Hinn maðurinn, sem er þrítugur, var handtekinn á hóteli í Melbourne eftir að 2,7 kíló af kókaíni fundust á hótelherbergi hans. Að því er segir á vef tollgæslunnar mun hann koma fyrir dómara í dag.

Talið er að virði efnanna sé alls um 2,5 milljónir ástralskra dollara eða sem samsvarar um 218 milljónum króna. Brot mannanna varða við lífstíðarfangelsi.






Fleiri fréttir

Sjá meira


×