Tónlist

Neon-gul finnsk poppstjarna

Stefán Þór Hjartarson skrifar
Alma segist ætla að troða upp með neon-gula hárið sitt í Listasafninu í kvöld.
Alma segist ætla að troða upp með neon-gula hárið sitt í Listasafninu í kvöld.

Finnska poppsöngkonan Alma er í þann mund að springa út og verða að alþjóðlegri stórstjörnu. Hún hefur þennan sérstaka finnska sjarma sem við Íslendingar þekkjum ágætlega og er í ofanálag að gera bráðskemmtilega popptónlist eins og virðist bara koma á færibandi frá Norðurlöndunum þessi misserin. Þegar blaðamaður náði tali af söngkonunni var hún stödd í Los Ang­eles að vinna að sinni fyrstu plötu.

Nú er tónlistin þín poppaður hrærigrautur af alls konar – hvernig myndir þú lýsa henni með eigin orðum?

„Þetta er popptónlist sem spannar allt frá partíi til pönks.“

Hvaða listamenn hafa haft mest áhrif á þig og fengu þig til að byrja að semja og gefa út tónlist?

„Þær Amy Winehouse, Lykke Li og Charli XCX auk svo margra annarra fáránlega hæfileikaríkra listamanna.“

Elton John spilaði lagið Karma með Ölmu í þættinum sínum um daginn og hann er yfirlýstur aðdáandi söngkonunnar og því liggur beint við að spyrja: Ertu búin að hitta Elton, Alma?

„Nei, en við höfum talað saman í gegnum email! Ég er að vona að við getum kannski hist bráðlega. Það er svo fáránlega mikill heiður að sjálfur Elton John hlusti á tónlistina mína, það er algjörlega brjálað!“

Blaðamaður stingur upp á að þau eigi að gera eins og Elton og rapparinn Young Thug gerðu um daginn og unnu, reyndar óbeint, að lagi saman. Elton var einmitt yfirlýstur aðdáandi rapparans og þeir hittust og svo varð til lag síðar. Alma tekur að sjálfsögðu vel í það.

„Haha! Já, það væri algjör draumur! Ef þú hittir hann segðu honum þá að ég sé algjörlega til í það.“

Alma er þekkt fyrir að vera ávallt með hár í skærum litum – hún gerði meira að segja lagið Dye my hair þar sem imprað er á þessum vana hennar.

Verður þú með hárið í einhverjum sérstökum lit vegna Airwaves hátíðarinnar? Má búast við bláum kannski?

„Ég er mjög hrifin af neon-gulum um þessar mundir og sá litur er eiginlega orðinn að eins konar einkennismerki mínu þannig að ég held að ég verði með hann í hárinu á næstunni.“

Hverju ertu að vinna að núna, Alma?

„Ég er að vinna að plötunni minni, guð minn góður hvað ég elska hana mikið og ég bara get ekki beðið eftir því að deila henni með öllum,“ hrópar Alma háfstöfum. Að lokum biðlar hún svo til þeirra Airwaves-gesta sem eru eitthvað efins um hvort þeir eigi að kíkja á tónleika hennar að koma bara. Hún lofar bæði partíi og hinum ýmsu óvæntu atburðum.

Alma spilar í Listasafninu klukkan 21.40 í kvöld.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.