Lífið

Í ræktinni með kolvetnisfíklinum og stressætunni: „Var búinn að ná hámarki í þyngd“

Stefán Árni Pálsson skrifar
Sigmundur hefur tekið af sér þrjátíu kíló.
Sigmundur hefur tekið af sér þrjátíu kíló.

Sigmundur Davíð Gunnlaugsson er búinn að missa þrjátíu kíló undanfarna mánuði og er hvergi nærri hættur. Sigmund þekkja líklega flestir sem fyrrum forsætisráðherra, formann Miðflokksins og sjónvarpsmann í fyrri tíð. Hersir Aron Ólafsson fór með Sigumundi Davíð í ræktina í Íslandi í dag á Stöð 2 í gærkvöldi.

Færri þekkja hann hins vegar sem mikinn líkamsræktarfrömuð, en þar hefur hann látið til sín taka undanfarna mánuði. Átakið byrjaði þegar kílóin voru orðin 127 á vigtinni, fleiri en nokkru sinni fyrr.

„Ég er búinn að missa þrjátíu kíló og þarf að missa kannski tíu í viðbót. Þegar maður fer að sjá þennan árangur og finna muninn þá langar mann til að hvetja aðra til þess að ná sama árangri. Þetta er löng saga hjá mér og ég er oft búinn að reyna fara í megrun og léttast. Stundum hef ég náð einhverjum árangri í einhvern tíma en aldrei náð eins miklum árangri og núna. Svo held ég að ég hafi verið búinn að ná hámarki í þyngd og maður ákvað bara að maður yrði að gera þetta.“

Sama nálgun og í pólitíkinni

Sigmundur segist hafa ákveðið að hætta að fresta hlutunum og veita sér ákveðnar undanþágur.

„Þetta var í raun sama nálgun og í pólitíkinni. Maður ákvað að ætla sér að klára þetta verkefni og láta ekkert stöðva mann.“

Nokkrir Miðflokksmenn ákváðu að snúa við blaðinu að frumkvæði þingmannsins Bergþórs Ólasonar, enda hafi þingflokkur þeirra verið orðinn sá lang þyngsti.

Sigmundur með dóttur sinni þegar hann var sem þyngstur.

„Þá kom Beggi með þessa hugmynd, að við ættum að sammælast um það að sá sem næði ekki að missa fimmtán kíló fyrir tiltekna dagsetningu þyrfti að greiða í eigin nafni 100 þúsund krónur í kosningasjóð Samfylkingarinnar,“ segir Sigmundur og bætir við að þetta hafi verið ágætis hvatti.

Sigmundur var orðinn 127,4 kíló þegar hann var sem þyngstur.

„Ég komst loksins nýverið undir 100 kíló en sá að það dugar ekki alveg til og nú er stefnan sett á 90 kíló. Það væri freistandi að fara niður í 87,4 kíló til að hafa misst fjörutíu kíló,“ segir Sigmundur en hann hefur í gegnum tíðina verið mikill kolvetnafíkill.

„Öll þessi sterkja. Brauð, pasta, hrísgrjón og kartöflur. Mér finnst þetta allt rosalega gott og gæti nánast lifað á því. Ég borðaði mjög mikið af því og var alltaf að borða. Er svona það sem kallast stressæta. Þegar það er mikið um að vera, þá borða ég meira.“

Sigmundur segist ekki vera á sérstökum matarkúr en: „Á margan hátt má segja að það sem hefur skilað mér þessum árangri sé framhald af íslenska kúrnum, íslenski kúrinn 2.0. Það snýst um að borða hollan íslenskan mat. Skyr, kjöt og ef maður vill svindla smá þá er það íslenskar kartöflur, maður eyðir ekki svindlinu í erlendar kartöflur.“

Hér að neðan má sjá innslagið frá því í gærkvöldi en þá var farið í ræktina með Sigmundi og farið yfir þau helstu atriði sem hann gerir í World Class Laugum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.