Viðskipti innlent

Síminn krefst húsleitar hjá RÚV vegna fréttar um Hafnartorg

Tryggvi Páll Tryggvason skrifar
Málið snýst um frétt um Hafnartorg í miðbæ Reykjavíkur.
Málið snýst um frétt um Hafnartorg í miðbæ Reykjavíkur. Vísir/Vilhelm

Síminn hefur krafist þess að Fjölmiðlanefnd rannsaki hvort að óeðlileg tengsl séu á milli auglýsingasölu og fréttaflutnings hjá RÚV. Málið er tilkomið vegna fréttar um framkvæmdir á Hafnartorgi sem Síminn telur að hafi verið dulin auglýsing. Er húsleit hjá RÚV eina leiðin sem skilað geti „óyggjandi niðurstöðu“ verði málið rannsakað að mati Símans.

Ríkisútvarpið greinir sjálft frá og birtir bréf Símans til Fjölmiðlanefndar í heild sinni á fréttavef RÚV. Undir bréf Símans skrifar Magnús Ragnarsson, framkvæmdastjóri sölusviðs Símans.

Sem fyrr segir er kvörtunarefni Símans frétt RÚV um framkvæmdir á Hafnartorgi sem birt var í fréttatíma RÚV þann 1. október síðastliðinn. Umrædda frétt má sjá hér. Í fréttinni er staðan tekin á framkvæmdum við Hafnartorg í miðbæ Reykjavíkur og rætt við þá sem standa að framkvæmdunum.

Magnús Ragnarsso er skrifaður fyrir bréfi Símans..

Segir að forsvarsmenn Hafnartorgs hafi viljað komast í fréttir með auglýsingu

Í bréfinu segir Magnús að forsaga málsins sé sú að forsvarsmenn Hafnartorgs hafi látið gera 63 sekúndna langa sjónvarpsauglýsingu. Um miðjan september hafi þeir óskað eftir tilboðum hjá ljósvakamiðlum um birtingu. Síminn hafi gert tilboð í birtingar sem ekki var tekið. Segir Magnús að ástæðan fyrir því að tilboðinu var hafnað hafi verið að Síminn reki ekki fréttastofu, það hafi verið ætlun forsvarsmanna Hafnartorgs að komast að í fréttum.

Þá segir Magnús að skömmu eftir að auglýsingar Hafnartorgs hafi birst í sjónvarpsútsendingum RÚV hafi hin „ótrúlega frétt“, líkt og Magnús kemst að orði, verið birt í aðalfréttatíma RÚV.

Telur Magnús upp nokkrar ástæður fyrir því að fréttin hafi verið „einstök“. Hún sé algjörlega einhliða og án allrar gagnrýni, rætt sé við forsvarsmenn framkvæmda við Hafnartorg og aðeins hafi verið lesnar upp jákvæðar tölur og staðreyndir. Þá sé fréttin „ótrúlega löng“ miðað annað efni fréttatímans. Auk þess sé mikil vinna lögð í fréttina, myndskeið tekin með aðstoð dróna og svo framvegis.

Miklar framkvæmdir hafa staðið yfir á Hafnartorgi undanfarin ár. Vísir/Vilhelm

Í bréfinu segir að fréttin „staðfestir í eitt skipti fyrir öll óheppileg og reyndar ólögleg tengsl auglýsingasölu og dagskrárgerðar hjá Ríkisútvarpinu“. Þó telur Magnús að ekki sé um beina sölu á birtingu innan fréttatíma heldur að „einhversstaðar hafa verið gerðir óformlegir samningar um liðlegheit hvort sem það var við auglýsingadeild eða almennatengla.“

Áður kvartað undan auglýsingasölu RÚV

Síminn hefur áður kvartað yfir auglýsingasölu RÚV. Síðast í tengslum við útsendingar á Heimsmeistaramótinu í knattspyrnu. Kvartað Síminn til Samkeppniseftirlitsins á þeim forsendum að RÚV hefði sett lágmarkskaup á tilteknu magni auglýsinga sem skilyrði fyrir kaupum á tilteknum auglýsingaplássum í tengslum við sýningar frá HM.

Var það frummat Samkeppniseftirlitsins að ekki hafi verið nægar vísbendingar um að RÚV hafi með háttsemi sinni ekki gengið samkeppnislögum, þótt fyrirtækið yrði talið vera markaðsráðandi á auglýsingamarkaði. Var markaðsaðilum þó gefinn kostur á að koma frekari athugasemdum á framfæri vegna málsins áður en endanleg ákvörðun væri tekin um hvort formleg rannsókn yrði hafin eða málinu lokið án frekari athugunar. Er málið því enn í ferli hjá Samkeppniseftirlitinu.

Í bréfi Símans segir að skoðun tölvugagna sé eina leiðin sem muni skila óyggjandi niðurstöðu og er því farið fram á húsleit hjá RÚV svo leggja megi hald á slík gögn. Segir Magnús að ef Fjölmiðlanefnd treysti sér ekki til þess að rannsaka málið frekar muni hann leita til annarra yfirvalda.

Ásakanir Símans hreinn atvinnurógur að mati fréttastjóra RÚV

Í frétt RÚV um kvörtun Símans er haft eftir Rakel Þorbergsdóttur, fréttastjóra RÚV, að ásakanir Magnúsar og Símans um óeðlileg og ólögleg tengsl fréttastofu RÚV við auglýsingasölu RÚV séu grafalvarlegar og hreinn atvinnurógur.

„Sjálfstæði fréttastofu RÚV gagnvart öðrum deildum fyrirtækisins er algert og engin dæmi þess að eldveggurinn milli fréttastofu og auglýsingadeildar hafi verið rofinn,“ er haft eftir Rakel sem bætir við að fréttin sem kvartað sé undan hafi verið unnin af frumkvæði fréttastofu RÚV og tölvupóstsamskipti fréttamannsins sem vann fréttina staðfesti það.

Fréttin hefur verið uppfærð með upplýsingum um hvar kvörtun Símans gegn RÚV vegna auglýsingasölu í tengslum við HM í sumar sé stödd hjá Samkeppniseftirlitinu.


Tengdar fréttir

Segja RÚV hafa farið fram með offorsi

Forsvarsmenn sjónvarpsstöðvanna Hringbrautar og N4 sakar auglýsingadeild Ríkisútvarpsins hafa farið fram með miklu offorsi í aðdraganda heimsmeistaramótsins í knattspyrnu



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
ICEAIR
1,8
6
20.349
MARL
1,32
4
79.593
HAGA
0,74
3
141.155
N1
0,41
5
190.896
EIK
0,26
3
34.958

Mesta lækkun dagsins


Félag
Br.%
Fjöldi
Velta*
GRND
-0,98
2
15.300
EIM
-0,73
4
23.410
SIMINN
0
4
20.348
SKEL
0
4
16.241
HEIMA
0
1
220
Velkomin á Vísi. Þessi vefur notar vafrakökur. Sjá nánar.