Innlent

Hafnaði kröfu um lögbann á vefinn Tekjur.is

Atli Ísleifsson skrifar
Ingvar Smári Birgisson með lögbannskröfuna fyrir utan skrifstofu sýslumanns á mánudaginn.
Ingvar Smári Birgisson með lögbannskröfuna fyrir utan skrifstofu sýslumanns á mánudaginn. Vísir/Vilhelm
Sýslumaðurinn á höfuðborgarsvæðinu hafnaði í dag kröfu Ingvars Smára Birgissonar um lögbann á vefinn Tekjur.is. Þetta staðfestir Ingvar Smári í samtali við Vísi. Ingvar Smári er lögfræðingur og formaður Sambands ungra sjálfstæðismanna.



Vefurinn Tekjur.is fór í loftið á föstudaginn en á honum er hægt að fletta upp tekjum og skattaupplýsingum allra þeirra Íslendinga sem hafa náð átján ára aldri.

Upplýsingarnar má nálgast með greiðslu áskriftargjalds sem nemur 2.790 krónur fyrir fyrsta mánuðinn og svo 790 krónur á mánuði eftir það.

Almennt úrræða er tiltækt

Í úrskurði sýslumanns segir að ekki sé talið að skilyrði lögbanns séu fyrir hendi og beiðninni því hafnað. Þar segir að Persónuvernd hafi þegar borist kvartanir vegna vefsíðunnar og samkvæmt lögum hafi Persínuvernd heimild til að fela lögreglustjóra að stöðva til bráðabirgða starfsemina og innsigla starfstöð, komi í ljós að fram fari vinnsla persónuupplýsinga sem brjóti í bága við lög. Lögbann sé neyðarúrræði og verði að telja ófært að því sé beitt í tilvikum þar sem almenn úrræði geti komið að halda. 

„Fyrir liggur að athöfn gerðarþola er þegar til skoðunar hjá viðeigandi stjórnvaldi og ákvörðunar að vænta. Með hliðsjón af framangreindu telur sýslumaður ekki tækt að beita lögbanni í máli þessu þar sem almennt urræði er tiltækt,“ segir í úrskurðinum.

Vonbrigði

Ingvar Smári segir niðurstöðu sýslumanns vera vonbrigði með vísun til þess að í niðurstöðu sé fallist á að brotið sé gegn lögvörðum rétti allra Íslendinga til friðhelgis einkalífs. „Aftur á móti telur sýslumaður að ég og aðrir munum ekki verða fyrir teljandi tjóni af því að bíða eftir dómsniðurstöðu. Síðan er vísað til þess – og það finnst mér líka ákveðin vonbrigði – að sýslumaður varpar ábyrgðinni yfir á Persónuvernd og heimilda þeirra til að stöðva atvinnurekstur ef hann brýtur gegn lögum um persónuvernd. Í þessari niðurstöðu er ekki verið að hafna rökstuðningi mínum og annarra heldur er verið að segja að við eigum að leita réttar okkar fyrir dómi.

Í ljósi þess að sýslumaður tekur undir að brotið sé gegn lögvörðum rétti til einkalífs tel ég auðvitað nauðsynlegt að leita réttar míns fyrir dómi. Það verður skoðað nánar á morgun hvernig það verður útfært.“

Gagnsæi

Jón Ragnar Arnarson, stjórnarformaður Viskubrunns ehf., rekstraraðila síðunnar, sagði í yfirlýsingu á föstudag að tilgangur vefsins væri að stuðla að „gagnsæi og samræmi í umfjöllun um skattamál“ og að birting upplýsinganna „byggi á heimild í sérstöku ákvæði skattalaga.“

Í kröfu Ingvars Smára sagði að Viskubrunnur ehf. hætti vinnslu persónuupplýsinga og verði gert að eyða upplýsingunum. Hann telur 2. málsgrein 98. greinar laga um tekjuskatt túlkaða alltof vítt í tilviki forsvarsmanna Tekjur.is.

Fréttin hefur verið uppfærð.


Tengdar fréttir

Fengu skattskrár allra Íslendinga frá ríkisskattstjóra

Tekjur.is fengu eintak af skattskrá allra Íslendinga frá ríkisskattstjóra í sumar. Fengu þeir sem standa að baki síðunni skrárnar afhentar á pappír sem þeir færðu síðan yfir á rafrænt form.

Krefst lögbanns á Tekjur.is

Ingvar Smári Birgisson, lögfræðingur og formaður Sambands ungra sjálfstæðismanna, gerði í hádeginu kröfu um lögbann á vefinn Tekjur.is.




Fleiri fréttir

Sjá meira


×