Innlent

Ágústa Eva stefnir Löðri vegna hurðarinnar sem kramdi hana næstum til bana

Tryggvi Páll Tryggvason skrifar
Ágústa Eva ásamt bjargvættinum, Birni Þorvaldssyni saksóknara.
Ágústa Eva ásamt bjargvættinum, Birni Þorvaldssyni saksóknara. Mynd/Ágúst Eva
Söng- og leikkonan Ágústa Eva Erlendsdóttir hefur stefnt bílaþvottastöðinni Löðri vegna atviks sem átti sér stað sumarið 2015. Klemmdist Ágústa Eva á milli hurðar á þvottastöð Löðurs og húddsins á bíl hennar. Var hún hætt kominn en það var henni til happs að saksóknarinn Björn Þorvaldsson var í næsta nágrenni og kom henni til bjargar.

Greint er frá stefnunni á vef Fréttablaðsins þar sem segir að munnlegur málflutningur vegna málsins fari fram í dag.Vísir greindi frá slysinu á sínum tíma.

„Ég er komin inn í einn svona bás með bílinn minn, búin að borga og svona og ætla að fara að þvo. Ég er búin að ýta á takkann fyrir tjöruhreinsi þegar ég heyri að það er stór hurð að fara af stað fyrir ofan mig. Ég sé að bíllinn minn er þannig staðsettur að hurðin er að fara að kremja húddið á honum þannig að ég ýti á móti hurðinni. Það var nú aðeins meiri kraftur í hurðinni en ég bjóst við þannig að ég ýti af öllu afli þar til hurðin stöðvast,“ sagði Ágústa Eva í samtali við Vísi.

Var hún stödd farþegamegin við bílinn þegar þetta gerðist og ákvað hún því að setjast við stýrið og bakka bílnum undan hurðinni.

„En þá fer hurðin aftur af stað og ég lendi á milli hurðarinnar og húddsins. Ég ligg á bakinu ofan á húddinu og hurðin er bara í fanginu á mér og byrjar aftur að fara niður. Ég spenni mig því bara alla en finn að ég er algjörlega pinnuð niður í bílinn. Ég byrja þá að öskra bara eins hátt og ég get á hjálp en það líður smástund þar til þarna kemur maður til að hjálpa mér,“ sagði Ágústa Eva.



Ágústa Eva fór með hlutverk Línu langsokks, sterkustu stelpu í heimi á þeim tíma sem slysið átti sér stað.Mynd/Borgaleikhúsið.

Magavöðvarnir og saksóknarinn björguðu lífi hennar

Sá maður var Björn Þorvaldsson sem hefur sótt sakamál tengd hruninu fyrir hönd sérstaks saksóknara. Hann var líka staddur á bílaþvottastöðinni að þrífa bílinn sinn. Reyndi hann að ýta hurðinni upp án árangurs og það var ekki furr en hann náði að bakka bílnum undan hurðinni að Ágústa Eva losnaði undan henni.

Þegar Vísir náði tali af Ágústu Evu eftir slysið árið 2015 hafði hún verið í skoðunum hjá læknum sem tjáðu henni að hún hefði auðveldlega geta dáið. Magavöðvar hennar hefðu hlíft ósæðinni sem liggur yfir kviðnum sem og innyflunum. Þá hafi hún orðið fyrir miklu andlegu áfalli.

Í samtali við Fréttablaðið gagnrýnir Ágústa Eva forsvarsmenn Löðurs sem hún segir hafa lofað bót og betrun en síðar reynt að leysa málið með því að bjóða henni ókeypis þvott á þvottastöðum fyrirtækisins. Það hafi hún hins vegar ekki tekið í mál.

„Þegar maður er næstum því búinn að týna lífi sínu er það síðasta sem maður hugsar um að fá ókeypis þvott,“ segir hún í samtali við Fréttablaðið.

Þá segir hún einnig að afleiðingar slyssins hafi verið miklar fyrir hana þar sem hún geti ekki lengur tekið þátt í leik- eða söngsýningum sem krefjist líkamlegs álags.


Tengdar fréttir

Saksóknari bjargaði lífi Ágústu Evu á bílaþvottastöð

Söng-og leikkonan Ágústa Eva Erlendsdóttir lenti í heldur skelfilegri lífsreynslu síðastliðinn sunnudag en hún var þá hætt komin þegar hún klemmdist á milli hurðar á bílaþvottastöð og húddsins á bílnum hennar.




Fleiri fréttir

Sjá meira


×