Matur

„Rjóma“pasta með brokkolí, sveppum og feikoni

Gunnþórunn Jónsdóttir skrifar
Rjómapastað.
Rjómapastað.

Rjómapasta með brokkolí, sveppum og feikoni

Það eru einhverjir töfrar í góðu rjómapasta. Þetta pasta gefur ekkert eftir í rjómastemningu, það er safaríkt og ostakennt, með stökku feikoni (vegan beikoni) og ætti ekki að svíkja einn einasta pastaunnanda.

1 pakki pasta að eigin vali (helst ferskt)

Nokkrir sneiddir sveppir, gaman að nota blöndu t.d. af hvítum, portóbelló og kastaníu

4-5 sneiðar feikon

½ rauðlaukur

3 hvítlauksgeirar

Tamarí- eða sojasósa

Hálfur brokkolíhaus

Um hálf askja vegan rjómaostur (fæst t.d. í Hagkaupum og Krónunni)

1 teningur sveppa- eða grænmetiskraftur

Salt og pipar

Feikon

Hrísgrjónapappír

Sojasósa

Reykt paprikukrydd

Aðferð

Útbúum fyrst feikonið. Útbúið kryddlög í skál úr soja- eða tamarísósu og reyktu paprikukryddi. Ef extra mikill metnaður hleypur í ykkur má nota sósuna „liquid smoke“ sem meðal annars fæst í Hagkaupum, það er vökvi sem gefur sterkt reykjarbragð og er tilvalinn í feikongerð. Klippið hrísgrjónapappírinn í strimla, í hefðbundinni beikonstærð, og leggið í löginn, í 10-12 sekúndur. Komið fyrir á bökunarpappírsklæddri ofnplötu og bakið á 190°C í 6-8 mínútur. Úr þessu fást stökkir strimlar með sterku bragði.

Sjóðið því næst pasta samkvæmt leiðbeiningum. Hellið hitaþolinni ólífuolíu á pönnu og svissið laukinn, leggið til hliðar. Bætið olíu á pönnuna og léttsteikið brokkolí með ríkulegum skammti af salti og pipar, leggið til hliðar. Bætið enn á ný olíu á pönnu og steikið sveppi með dassi af tamarísósu og hvítlauk. Bræðið rjómaostinn í potti, brytjið kryddteninginn smátt og blandið saman við þar til hann hefur leyst upp og blandast. Komið pasta fyrir í stórri skál, hellið sósu út á, grænmetinu og loks söxuðu feikoni. Blandið vel saman. Gott er að strá söxuðum valhnetum eða steiktum sesamfræjum út á.

Athugasemd: Í þessa uppskrift er tilvalið að nýta kjúklingabaunasafa (aquafaba) til þykkingar. Þá skvettið þið örlitlu magni út í eftir að öllu hefur verið blandað saman.

Uppskrift: Guðrún Sóley Gestsdóttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.