Tónlist

Miðasölurisi sér um Sónar-hátíðina

Stefán Þór Hjartarson skrifar
Erlendir gestir munu ekki eiga í vandræðum með að kaupa miða með tilkomu StubHub.
Erlendir gestir munu ekki eiga í vandræðum með að kaupa miða með tilkomu StubHub. Fréttablaðið/Andri Marinó
Erlendum gestum hefur fjölgað jafnt og þétt á tónlistarhátíðinni Sónar Reykjavík síðustu árin og hefur nú verið gerður samningur við StubHub til að mæta þessari þróun. Miðasala á hátíðina er hafin.

„Hátíðin hefur verið í mikilli þróun undanfarin ár – trendið hefur verið þannig að hlutfall erlendra gesta hefur aukist mikið. Á síðasta ári var það orðið 50/50. Markaðurinn hérna heima hefur verið mettaður og samkeppnin er mikil – það er ekki nóg með að það sé samkeppni á milli tónleika heldur finnst okkur að aðalsamkeppnin sé við viðburðahald erlendis: það eru Íslendingar að fara til Berlínar á Berghain, Óslóar á Kendrick Lamar, þeir fara til London á O2 stórtónleika og svo framvegis,“ segir Steinþór Helgi Arnsteinsson hjá Sónar Reykjavík en forsvarsmenn hátíðarinnar hafa gert samning við bandaríska miðasölurisann StubHub um miðasölu fyrir næstu hátíð og er það tilraun þeirra til að auka hlutfall erlendra gesta en þar segir hann að helsti vaxtarbroddur hátíðarinnar liggi.

„Við eigum hér á Íslandi mjög dyggan kúnnahóp sem við viljum allt gera fyrir en stærð markaðarins hér á landi er bara þannig að það er erfitt að stækka hann – við erum ekki risa-festival sem er að elta allra stærstu popplistamennina, því þeir eru of dýrir og við komum þeim ekki fyrir. Tækifæri okkar til að stækka liggur í að fá fleiri erlenda gesti og við erum í raun bara að hlúa að þeirri þróun, en þeim hefur fjölgað jafnt og þétt. Þannig að við fórum í það að finna erlendan aðila til að sjá um miðasöluna.“

Steinþór segir nokkra aðila hafa komið til greina en á endanum var það StubHub sem varð fyrir valinu. Fyrirtækið, sem er í eigu eBay, er ásamt Ticketmaster stærsta miðasölufyrirtæki í heiminum. StubHub hóf nýlega samstarf við Sónar í Barcelona, en hátíðin átti metár í ár og seldust yfir 130 þúsund miðar. Að sögn Steinþórs voru þeir hjá StubHub gríðarlega spenntir fyrir að komast inn á framandi markað eins og Ísland.



„Við erum að taka stórt skref í því að breyta því hvernig við markaðssetjum okkur og hvernig við nálgumst miðasöluna. Ferlið verður miklu þægilegra, bæði fyrir Íslendinga og útlendinga – það hefur verið þröskuldur fyrir erlenda gesti að þurfa að fara inn á íslensku síðurnar, breyta í ensku, sjá svo bara verð í íslenskum krónum og vita ekkert hvernig þau virka, hvað er kennitala og svo kemur bara staðfestingarpóstur á íslensku sem segir þeim ekki neitt.“

Miðaverðið verður því í evrum héðan í frá og fylgir gengi gjaldmiðilsins. Bæði vegna þess og vegna mikillar samkeppni frá erlendum elektrónískum tónlistarhátíðum mun verðið lækka og er nú 130 evrur, eða um 16–17.000 íslenskar krónur.

„Við erum að vona að bæði íslenskir og erlendir neytendur taki vel í þetta. Við erum gríðarlega spenntir fyrir samstarfinu við StubHub og því að fá erlendan aðila inn á þennan markað – kannski hristir það eitthvað upp í hlutunum.“

Þeir Íslendingar sem finnst mögulega óþægilegt að kaupa miða í gegnum erlenda aðila þurfa þó ekki að örvænta því að miða á hátíðina má finna á harpa.is. Hátíðin fer fram 25.–27. apríl á næsta ári og er miðasalan hafin en fyrstu listamenn á hátíðina verða kynntir eftir viku.


Tengdar fréttir

Á sviði á sama tíma og stærsta númerið

Reykjavíkurdætur spiluðu á Sónar Reykjavík um helgina en þær spiluðu á sama tíma og stærsta atriði hátíðarinnar, með bresku sveitinni Underworld, fór fram í sal við hliðina og létu það ekki á sig fá.






Fleiri fréttir

Sjá meira


×