Erlent

Elsta teikning sögunnar fundin

Kjartan Hreinn Njálsson skrifar
Ekki hefur tekist að ráða í merkingu 73 þúsund ára teikningar.
Ekki hefur tekist að ráða í merkingu 73 þúsund ára teikningar. Mynd/Nature
Vísindamenn við Bord­eaux-háskóla í Frakklandi telja sig hafa fundið elstu teikningu heims. Teikningin, eða að minnsta kosti hluti hennar, fannst á steini í Suður-Afríku og einkennist af krossa­mynstri. Teikningin er talin vera í kringum 73 þúsund ára gömul.

Vísindamönnunum hefur ekki tekist að ráða í merkingu línanna, en þær virðast tilheyra stærri teikningu.

Undanfarin sjö ár hafa vísindamennirnir freistað þess að greina uppruna steinsins en hann fannst þegar fornleifafræðingar rannsökuðu ævaforna örvarodda í helli um 300 kílómetra austur af Höfðaborg.

„Þetta er elsta teikning mannkynssögunnar,“ segir Francesco d’Erruco, einn rannsakenda. Þar til nú hafa fornleifafræðingar talið að elstu teikningar mannskepnunnar sé að finna í hellum á Spáni og í Indónesíu. Þær teikningar eru aðeins 40 þúsund ára gamlar.






Fleiri fréttir

Sjá meira


×