Enski boltinn

Uxinn boxar á fullu í endurhæfingunni

Óskar Ófeigur Jónsson skrifar
Alex Oxlade-Chamberlain.
Alex Oxlade-Chamberlain. Vísir/Getty

Liverpool leikmaðurinn Alex Oxlade-Chamberlain meiddist illa á hné á síðustu leiktíð og verður væntanlega ekkert með Liverpool liðinu á þessu tímabili.

Oxlade-Chamberlain var orðinn fastamaður á miðju Liverpool þegar hann meiddist eftir aðeins fimmtán mínútur í leik á móti Roma í undanúrslitum Meistaradeildarinnar.

Það var strax ljóst að Oxlade-Chamberlain myndi missa af restinni af tímabilinu sem og af HM í Rússlandi með enska landsliðinu.

Í júlí greindi svo Jürgen Klopp, knattspyrnustjóri Liverpool, frá því að Oxlade-Chamberlain myndi líklega missa af öllu 2018-19 tímabilinu vegna alvarleika fyrrnefndra meiðsla.

Oxlade-Chamberlain er samt á fullu í endurhæfingu þótt að hann spili ekki fótbolta og Sky Sports birti myndband af honum sýna hæfileika sína sem hnefaleikamanns. Það má sjá það hér fyrir neðan.



Alex Oxlade-Chamberlain kom til Liverpool í fyrra haust og skrifaði þá undir fimm ára samning. Liverpool borgaði Arsenal 35 milljónir punda fyrir hann.

Oxlade-Chamberlain byrjaði rólega en vann sig í goggunarröðinni hjá Liverpool liðinu og endaði með 3 mörk og 7 stoðsendingar í 35 leikjum í ensku úrvalsdeildinni.

Hann skoraði einnig tvö mörk í Meistaradeildinni þar af annað þeirra í 3-0 sigri á Manchester City á Anfield.

Liverpool styrkti sig með tveimur öflugum miðjumönnum í sumar og Alex Oxlade-Chamberlain fær því tækifæri til að ná sér að fullu af meiðslunum. Hann er enn bara 25 ára gamall og á því nóg eftir á ferli sínum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.