Hazard bauð upp á sýningu gegn Cardiff

Eden Hazard bauð upp á sýningu á Stamford Bridge í dag er Chelsea vann 4-1 sigur á Cardiff sem komst þó yfir í leiknum.

Eftir sextán mínútur var það Sol Bamba, varnarmaðurinn öflugi, sem kom gestunum frá Wales yfir en Eden Hazard jafnaði metin á 37. mínútu.

Sjö mínútum síðar, eða einni mínútu fyrir hlé, skoraði Hazard annað mark sitt og annað mark Chelsea. Chelsea 2-1 yfir í hálfleik.

Hazard var ekki hættur. Chelsea fékk vítaspyrnu á 80. mínútu og þar steig Belginn á punktinn. Hann skoraði af öryggi, líkt og á Laugardalsvellinum fyrr í vikunni.

Það var svo Brasilíumaðurinn Willian sem batt endahnútinn á góðan leik Chelsea er hann skoraði fjórða mark Chelsea sjö mínútum fyrir leikslok.

Chelsea er því á toppi deildarinnar með fullt hús stiga líkt og Liverpool en Cardiff er með tvö stig eftir fimm leiki. Aron Einar Gunnarsson lék ekki með liðinu vegna meiðsla.