Íslenski boltinn

Ólafur Kristjánsson í september er kryptónít KR-inga

Óskar Ófeigur Jónsson skrifar
FH-ingar fagna einu marka sinna í gær.
FH-ingar fagna einu marka sinna í gær. Vísir/Daníel

Ólafur Kristjánsson hefur þrisvar sinnum burstað KR-inga í septembermánuði en stórsigurinn í gær hélt lífi í Evrópudraumum FH-liðsins.

FH náði KR að stigum í baráttunni um fjórða sætið og minnkaði markamuninn á milli liðanna um átta mörk. Hvert mark FH-liðsins var því í raun tveggja marka virði.

Það er greinilega ekki gott fyrir KR-inga að mæta liði Ólafs Kristjánssonar í september. FH vann 4-0 stórsigur á KR í lokaleik 19. umferðar Pepsi-deildarinnar í gær og það er ekki í fyrsta sinn sem lið Ólafs Kristjánssonar rassskellir Vesturbæjarliðið í þessum mánuði.

KR hefur einu sinni áður tapað svona stórt í tólf liða deild og það var í leik á móti Breiðabliki í september 2012. Þjálfari Blika í þeim leik var einmitt Ólafur Kristjánsson, núverandi þjálfari FH-liðsins.

Breiðablik vann þá 4-0 sigur á KR-vellinum og einn markaskorara Blika var Kristinn Jónsson sem spilaði með KR-liðinu í Kaplakrika í gær.

Ólafur Kristjánsson er líka í hópi þeirra fimm þjálfara sem hafa náð að vinna þriggja marka sigur á KR í tólf liða efstu deild. Sá sigur kom einnig í september en Blikar unnu þá 3-0 sigur á KR 19. september 2013.

Ólafur hefur nú þrisvar sinnum unnið þriggja marka eða stærri sigur á KR í 12 liða efstu deild eitthvað sem enginn annar þjálfari hefur náð oftar en einu sinni og flestir þjálfarar aldrei.

Það er jafnvel hægt að ganga svo langt að halda því fram að Ólafur Kristjánsson sé kryptónít KR-inga í Pepsi-deildinni. Kryptónít er eina efnið sem bítur á Súperman í samnefndum sögum.

Ólafur hefur alls stýrt liði fjórum sinnum á móti KR í september í Pepsi-deildinni frá árinu 2010 og lið hans hefur unnið þá alla með tveimur mörkum eða meira. Markatalan er 14-1 liðum Ólafs í vil.

Ólafur Kristjánsson. vísir/bára

Stærstu töp KR í Pepsi-deildinni í tólf liða deild:

-4
0-4 á móti Breiðabliki 16. september 2012 (Ólafur Kristjánsson þjálfaði lið Blika)
0-4 á móti FH 2.september 2018 (Ólafur Kristjánsson þjálfaði lið FH)

-3
0-3 á móti Fram 21. júní 2009 (Þorvaldur Örlygsson þjálfaði lið Fram)
0-3 á móti Breiðabliki 19. september 2013 (Ólafur Kristjánsson þjálfaði lið Blika)
0-3 á móti Val 7. júní 2015 (Ólafur Jóhannesson þjálfaði lið Vals)
0-3 á móti Stjörnunni 20. september 2015 (Rúnar Páll Sigmundsson þjálfaði lið Stjörnunnar)
0-3 á móti ÍBV 9. september 2017 (Kristján Guðmundsson þjálfaði lið ÍBV)


Leikir KR í september á móti liði undir stjórn Ólafs Kristjánssonar frá 2010:
16. september 2010: Breiðablik vann 3-1 útisigur á KR
16. setpember 2012: Breiðablik vann 4-0 útisigur á KR
19. september 2013: Breiðablik vann 3-0 heimasigur á KR
2. september 2018: FH vann 4-0 heimasigur á KR

Samtals:
4 leikir
4 sigrar
14 mörk skoruð
1 mark fengið á sig
+13 í markatölu
3 leikir haldið hreinu



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.