Fótbolti

Gummi Ben hitti Erik Hamrén: Sagður galinn að taka við Íslandi á þessum tímapunkti

Tómas Þór Þórðarson skrifar
Eric Hamrén ræddi heima og geima við Gumma Ben.
Eric Hamrén ræddi heima og geima við Gumma Ben. vísir/arnar halldórsson
Svíinn Erik Hamrén, nýr landsliðsþjálfari Íslands í fótbolta, stýrir strákunum okkar í fyrsta sinn á laugardaginn þegar að íslenska liðið mætir því svissneska í fyrsta leik Þjóðadeildarinnar.

Hamrén, strákarnir og starfsliðið mættust í Schrun í Austurríki á mánudaginn þar sem að hópurinn æfir fram á fimmtudagin en þá verður haldið yfir til St. Gallen í Sviss þar sem að leikurinn fer fram. Hamrén er ánægður með allt hingað til.

„Starfsliðið er mjög gott. Það er með mikla reynslu og hefur mikla þekkingu. Ég er ánægður með það. Ég þekkti leikmennina betur áður en ég kom og þeir hafa ekki komið mér mikið á óvart. Þeir eru góðir og ég er sáttur fyrir utan öll meiðslin,“ segir Hamrén í viðtali við Guðmund Benediktsson á sundlaugabakkanum sem má sjá neðst í fréttinni.

Íslenska liðið hefur verið ævintýralega heppið með meiðsli undanfarin ár en Hamrén nýtur ekki góðs af því. Hann verður án fyrirliðans Arons Einars Gunnarssonar, markahróksins Alfreðs Finnbogasonar og vængmannsins Jóhanns Bergs Guðmundssonar og þá eru fimm leikmenn ekki að æfa með hópnum vegna meiðsla. Býst hann við að geta notað alla á laugardaginn?

„Ég vona það. Við þurfum að sjá til á næstu dögum.  Við pössuðum betur upp á Jón Daða því honum var illt í maganum í síðustu viku. Við tökum þessu því rólega með hann. Vonandi verða allir klárir í slaginn á laugardaginn en ég veit bara ekki stöðuna núna,“ segir Hamrén.

„Ég hef engar áhyggjur því þeir sem hafa ekki verið að spila mikið vegna meiðsla að undanförnu eru reynslumiklir. Þeir geta nýtt reynsluna í þessum leikjum en til lengri tíma litið er þetta ekki gott.“

Strákarnir æfa í Schruns fram að leik.mynd/ksí

Rosalegur árangur

Íslenska liðið hefur vakið athygli með stórum úrslitum á undanförnum árum og vonast Hamrén eftir því að leikmennirnir sýni sama hugarfar og þeir hafa gert á vegferð sinni upp fótboltafjallið.

„Vonandi getum við sýnt sama hugarfar og Ísland hefur sýnt í langan tíma. Ísland hefur farið í leiki til að vinna þá og vinna saman sem lið. Við eigum fyrir höndum rosalega erfiða mótherja í Sviss og Belgíu. Þegar litið er raunhæft á þetta ættum við að enda í þriðja sæti,“ segir Hamrén.

„En, Ísland hefur sýnt áður að það vill reyna að vinna svona leiki. Svo er bara að sjá til hvort það tekst. Markmiðið okkar er að ná í eins mörg stig og hægt er. Þetta er áhugavert mót að mínu mati en ég fengi ég að velja hefði ég byrjað á tveimur vináttuleikjum til að prófa ýmsa hluti,“ segir hann.

Það er alltaf erfitt að taka við af sigursælum mönnum og hvað þá að taka við af Heimi Hallgrímssyni sem ásamt Lars Lagerbäck kom Íslandi á EM og gerði svo enn betur sjálfur og kom liðinu á HM í fyrsta sinn.

„Sumir hafa sagt við mig að það sé galin hugmynd að taka við þessu liði núna. Árangurinn hefur verið rosalegur. Þetta er mikil áskorun en ég elska það. Ég er á því að ef við verðum heppnari með meiðsli en núna getum við þróað liðið meira. Það er minn metnaður en við þurfum á okkar bestu leikmönnum að halda,“ segir Hamrén.

Eric Hamrén stýrði sænska landsliðinu með ágætum árnagri áður en að hann tók við Íslandi.vísir/getty
Gæti spilað 3-5-2

Ísland hefur verið þekkt fyrir að spila 4-4-2 eftir sænska módelinu sem Lars Lagerbäck kom með til Íslands. Guðmundur spyr Hamrén hvort hann haldi sig við hið sænska 4-4-2?

„Það má nú kalla þetta hefðbundið íslenskt 4-4-2 í dag,“ segir Hamrén og hlær.

„Þið hafið spilað það kerfi rosalega vel. Eins og ég sagði á fyrsta blaðamannafundi ætla ég ekki að breyta öllu yfir nótt. Grunnurinn frá Heimi og Lars er frábær að mínu mati. Metnaður minn er bara að þróa liðið áfram og bæta góðu hlutina. Við byrjum á 4-4-2 eða 4-4-1-1 í fyrsta leik,“ segir Svíinn en bætir við:

„Ég hef líka áhuga á að spila með þriggja manna miðvarðalínu því við erum með mikið af miðvörðum en færri bakverði. Það er eitthvað sem ég er að hugsa núna. Ég vil ekki byrja á því núna samt.“

Hamrén vill koma Íslandi á EM 2020. Það er stóri draumurinn. Það verður erfitt, sérstaklega ef meiðslin halda áfram að hrannast upp.

„Draumur minn núna er að komast á þriðja stórmótið á röð og komast á EM 2020. Það er líka það sem að íslenska sambandið vill. Við vitum að þetta verður erfitt. Stærri þjóðir en Ísland hafa átt í vandræðum með að komast á stórmót undanfarið en ég held að við getum það,“ segir Hamrén.

Það er fallegt í Schruns á þessum árstíma.mynd/ksí

Keppt við gullkynslóðina

Íslenska liðið er orðið ansi gamalt en yngri menn eru farnir að banka laust á dyrnar. Því miður fyrir Hamrén fékk hann enga vináttuleiki til að gefa ungum puttum séns en þeir munu fá sín tækifæri. Aðalatriðið er að vera nógu góður til að spila fyrir Ísland.

„Það er gott fyrir landslið þegar að yngri menn koma upp en minni lið eins og Ísland, Danmörk, Noregur og Svíþjóð fá ekki menn jafnhratt upp til að fylla í stöðurnar. Stundum koma upp góðir árgangar en svo koma kannski nokkur ár þar sem minna gerist. Þetta er eitthvað sem að við þurfum að sætta okkur við,“ segir Hamrén.

„Það skiptir mig engu máli hvort að leikmaður sé 37 ára eða 17 ára ef hann er nógu góður. Ef við hefðum fengið vináttuleiki fyrst hefðum við kannski prófað einhverja unga leikmenn. Þessir ungu strákar þurfa samt líka að vera að spila reglulega og standa sig vel. Þessir strákar eru að berjast um sæti við gullkynslóðina,“ segir Erik Hamrén.

Allt viðtalið má sjá í spilaranum hér að neðan.


Tengdar fréttir




Fleiri fréttir

Sjá meira


×