Erlent

Trump og félagar berjast gegn bók Woodward

Samúel Karl Ólason skrifar

Eftir hæga byrjun eru Donald Trump, forseti Bandaríkjanna, og bandamenn hans komnir á fullt í að gagnrýna nýja bók blaðamannsins Bob Woodward sem heitir Ótti. Trump sjálfur segir bókina vera „leiðinlega“, „ósanna“ og „algjöran skáldskap“. Í bókinni kemur fram að nánustu samstarfsmenn Trump telja hann vera „vanstilltan“ og „vitleysing“ og að mikill glundroði ríki innan veggja Hvíta hússins.

Woodward stendur við sannleiksgildi bókarinnar og segir hana byggja á fjölda samtala við núverandi og fyrrverandi starfsmenn Hvíta hússins.

Sjá einnig: Eldfimar uppljóstranir um glundroða í Hvíta húsinu í bók Watergate-blaðamanns

„Er það ekki miður að einhver geti skrifað grein eða bók, algerlega búið til sögur og búið til mynd af manneskju sem bókstaflega þveröfug við raunveruleikann, og komist upp með það án afleiðinga eða kostnaðar. Ég veit ekki af hverju stjórnmálamenn í Washington breyta ekki lögum um meiðyrði,“ skrifaði Trump á Twitter í dag.

Hann bætti svo við og sagði „nánast alla“ sammála um að ríkisstjórn hans hefði áorkað meira á tæpum tveimur árum en allar aðrar ríkisstjórnir í sögu Bandaríkjanna.

„Ég er andskoti harður við fólk og ef ég væri það ekki myndi ekkert gerast. Einnig, ég efast um alla og allt, sem er ástæðan fyrir því að ég var kosinn.“

Meðal þeirra sem segjast ekki hafa talað um forsetann eins og segir í bókinni eru James Mattis, varnarmálaráðherra, og John Kelly, starfsmannastjóri Hvíta hússins. Skilaboðin frá Hvíta húsinu voru á þá leið að sögurnar væru runnar undan rifjum fyrrverandi starfsmanna sem væru að reyna að hefna sín á Trump. Það tók Hvíta húsið þó um fjóra tíma að senda frá sér tilkynningu eftir að fregnir um bókin fóru að birtast.

Síðan þá hefur Trump margsinnis tíst um bókina.

Í einu tísti benti hann á að Mattis og Kelly hefðu sagt bókin ranga og þar væri einnig haldið fram að hann hefði kallað Jeff Sessions „þroskaheftan“ og „heimskan suðurríkjabúa“. Það sagði Trump að væri ekki rétt. Hann hefði aldrei kallað nokkurn mann þroskaheftan og sagði Woodward halda þessu fram til að skapa deilur á milli hans og Sessions.

Það er þó ljóst að Trump hefur minnst tvisvar sinnum kallað einhvern þroskaheftan í útvarpi. Þá segir blaðamaður Axios að hann hafi margsinnis rætt við fyrrverandi starfsmenn Hvíta hússins sem hafi sjálfir heyrt Trump kalla Sessions þroskaheftan.

Þar að auki liggur alveg fyrir að Trump þarf enga hjálp við að skapa deilur á milli hans og Jeff Sessions. Undanfarna mánuði hefur Trump ítrekað gagnrýnt Sessions alvarlega og grafið undan honum í starfi dómsmálaráðherra. Trump hefur einnig gefið í skyn að hann muni reka Sessions eftir þingkosningarnar í nóvember.

Að mestu má rekja gremju Trump gagnvart Sessions til þess að ráðherrann sagði sig frá Rússarannsókninni svokölluðu eftir að hann var gómaður við að segja þingmönnum ósatt um samskipti sín og Sergei Kislyak, þáverandi sendiherra Rússlands í Bandaríkjunum.

Trump gagnrýndi Sessions síðast á mánudaginn þegar hann tísti um tvö dómsmál sem hafa verið höfðuð gegn tveimur þingmönnum Repúblikanaflokksins, sem voru einnig tveir fyrstu stuðningsmenn Trump á bandaríska þinginu. Annar er sakaður um innherjaviðskipti og hinn um að nota kosningasjóði sem eigin sparibauka.

Sjá einnig: Notaði kosningasjóði sem eigin sparibauka

Í umræddu tísti gagnrýndi Trump dómsmálaráðuneytið og Sessions fyrir að hafa ákært mennina svo skömmu fyrir kosningar og þannig dregið úr möguleikum Repúblikanaflokksins til að halda þingsætum þeirra.

Varnir Hvíta hússins vegna bókar Woodward hafa einnig vakið athygli vegna þess hve mikið þær líkjast gömlum yfirlýsingum. Yfirlýsing Kelly þykir sérstaklega líkjast yfirlýsingu hans frá því í vor þegar fregnir bárust af því að hann hefði kallað Trump „fávita“.

Þá sagði hann samband hans og Trump vera sterkt og heiðarlegt og að fregnirnar væru „algjört kjaftæði“. Alveg eins og nú.

Samkvæmt heimildum Washington Post innan Hvíta hússins virtist Trump ævareiður í gærkvöldi og krafðist hann þess að fá að vita hverjir hefðu talað við Woodward. Hvatti hann starfsmenn sýna til að segja að ekkert væri til í frásögnunum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.