Innlent

Segir bróður sinn hafa fengið far til Akureyrar og horfið

Kristín Ólafsdóttir skrifar
Andrius Zelenkovas.
Andrius Zelenkovas. Mynd/lögreglan á höfuðborgarsvæðinu

Lögregla á höfuðborgarsvæðinu rannsakar nú hvarf 27 ára litháísks karlmanns, Andriusar Zelenkovas. Ekkert hefur spurst til hans síðan í byrjun ágúst. Systir Andriusar hefur óskað eftir aðstoð við leit að honum á samfélagsmiðlum síðustu daga en lýst var formlega eftir Andriusi í dag.

Systir Andriusar, Ausra Dawn, segir í samtali við Vísi að hann hafi verið búsettur á Íslandi síðan í mars á þessu ári. Hún segir að þann 4. ágúst síðastliðinn hafi Andrius fengið far með konu til Akureyrar en ekkert er vitað um ferðir hans síðan. Ausra hefur auk þess eftir lögreglu í Litháen að Andrius hafi ekki snúið aftur þangað síðan hann hvarf.

Guðmundur Páll Jónsson lögreglufulltrúi hjá lögreglunni á höfuðborgarsvæðinu segir í samtali við Vísi að málið hafi komið inn á borð lögreglu á mánudag. Rannsókn á hvarfi Andriusar hófst síðar sama dag.

Guðmundur segir nú verið að skoða hvort Andrius hafi farið úr landi. Lögregla rannsakar einnig netsamskipti auk gagna úr farsíma og tölvu sem gætu varpað ljósi á ferðir Andriusar. Þá hefur lögregla einnig rætt við systur Andriusar vegna hvarfsins.

Eins og áður sagði lýsti lögreglan á höfuðborgarsvæðinu eftir Andriusi í dag. Þeir sem geta veitt upplýsingar um ferðir Andriusar, eða vita hvar hann heldur sig, eru beðnir um að hafa samband við lögreglu í síma 444 1000. Upplýsingum má einnig koma á framfæri í tölvupósti á netfangið gudmundur@lrh.is eða í einkaskilaboðum á fésbókarsíðu Lögreglunnar á höfuðborgarsvæðinu.


Tengdar fréttir

Lögregla lýsir eftir Andriusi

Lögreglan á höfuðborgarsvæðinu lýsir eftir Andriusi Zelenkovas, 27 ára, frá Litháen. Andrius er 175 sm á hæð, grannvaxinn og með skollitað hár.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.