Formúla 1

Alonso ánægður með Indycar-tilraunaaksturinn

Kjartan Kjartansson skrifar
Alonso virtist glaður í bragði í Honda-bíl Andretti-liðsins í gær.
Alonso virtist glaður í bragði í Honda-bíl Andretti-liðsins í gær. McLaren/Twitter
Spænski ökuþórinn Fernando Alonso lýsti ánægju sinni eftir að hann prófaði Indycar-bíl í Alabama í Bandaríkjunum í gær. Flest virðist nú benda til þess að tvöfaldi Formúlu 1-heimsmeistarinn aki vestanhafs í Indycar-mótaröðinni á næsta tímabili.

Alonso ók Honda-bíl á vegum Andretti Autosport-liðsins á Barber-brautinni í Alabama í gær. Engir áhorfendur eða fjölmiðlar fengu að vera á staðnum, að sögn Autosport.

Eftir á sagðist Alonso sérstaklega ánægður með að hafa fengið tækifæri til að prófa bílinn við allar aðstæður en brautin var blaut framan af degi. Lengi hafi staðið til að hann prófaði Indycar-bíl en tækifærið hafi ekki gefist fyrr en í gær.

„Þetta var góður dagur, skemmtilegur dagur. Ég elska að prófa nýja bíla og að prófa Indycar á [hefðbundinni braut] er nokkuð einstakt,“ sagði Spánverjinn sem hafði fram að gærdeginum aðeins ekið Indycar-bíl á risasporöskjubrautinni í Indianapolis, þá einnig með Andretti-liðinu.

Þrátt fyrir háværa orðróma hafa hvorki Alonso né McLaren-liðið staðfest þátttöku sína í Indycar-mótaröðinni á næsta ári. Tilraunaaksturinn í gær telja margir öruggt merki um að Alonso ætli sér að keppa vestanhafs á næsta tímabili til þess að freista þess að vinna Indy 500-kappaksturinn sögufræga. Þannig myndi Alonso ná hinni svonefndu þreföldu kórónu akstursíþrótta: sigri í Mónakó, Les Mans og í Indy 500. Hann tilkynnti á dögunum að hann ætlaði að hætta í Formúlu 1 eftir þetta tímabil.

Ökumenn frá Evrópu hafa stundum hikað við að keppa í Bandaríkjunum vegna sporöskubrautanna (e. Oval) sem keppt er á hluta tímabilsins í Indycar. Alonso stóð sig hins vegar vel þegar hann keppti í Indy 500 í fyrra. Hann var á meðal efstu manna áður en Honda-vélin í bíl hans gaf sig undir lok keppninnar.

„Ég held að ég elski tilfinninguna í bílnum á hefðbundinni braut en ég elska hvernig maður keppir á sporöskjunum, hvernig maður tímasetur kjölsogið, umferðina og allur frammúraksturinn sem ég held að sé svolítið auðveldari á sporöskjunum þannig að ég elskaði hasarinn á brautinni í Indy 500,“ sagði Alonso.

Hér fyrir neðan má sjá myndband og viðtal við Alonso sem Indycar birti eftir tilraunaaksturinn í gær.


Tengdar fréttir

Alonso hættir í Formúlu 1

Tvöfaldi heimsmeistarinn Fernando Alonso hefur gefið það út að hann muni hætta þátttöku í Formúlu 1 að keppnistímabilinu loknu.

Alonso prófar Indycar í næstu viku

Yfirmaður McLaren hefur staðfest að Spánverjinn prófi núverandi útgáfu Indycar-bílsins í Alabama í næstu viku.




Fleiri fréttir

Sjá meira


×