Innlent

Hafna því að þögult verðsamráð eigi sér stað

Berghildur Erla Bernharðsdóttir skrifar

Framkvæmdastjóri Krónunnar vísar ummælum um að verslunarkeðjan eigi í verðsamráði við Bónus algjörlega á bug. Framkvæmdastjóri Bónuss segir verslunarkeðjunni óheimilt að selja vörur undir kostnaðarverði. Kvörtun vegna mögulegs þöguls samráðs Krónunnar og Bónuss eru ekki til rannsóknar af hálfu Samkeppniseftirlitsins og engar ákvarðanir hafa verið teknar um slíka rannsókn samkvæmt upplýsingum fréttastofu.

Í kvöldfréttum Stöðvar 2 í vikunni var sagt frá verðlagskönnun ASÍ þar sem kom í ljós að síðasta ár hafi einkennst af aðeins einnar til tveggja krónu verðmun á vörum milli Bónuss og Krónunnar. Verkefnastjóri ASÍ taldi að um þögult samráð væri að ræða.

Gréta Margrét Grétarsdóttir, framkvæmdastjóri Krónunnar, tekur alfarið fyrir að slíkt samráð sé fyrir hendi og fullyrðir að samkeppnin á markaðinum sé virk. Hún segist ekki geta svarað fyrir Bónus um hvers vegna svo lítill munur sé á verði í verslunum keðjanna tveggja.

„Verðlagning okkar er út frá okkar innkaupsverði. Við skilum því sem við fáum í bættum kjörum hjá birgjum beint til viðskiptavina,“ segir hún.

Segir gengisstyrkingu hafa haldið verðlagi stöðugu

Guðmundur Marteinsson, framkvæmdastjóri Bónuss, segir að lítill verðmunur í könnun ASÍ skýrist af lágri álagningu í þeim vöruflokkum sem ASÍ skoði í sínum könnunum. Bónus sé skilgreint sem markaðasráðandi og því óheimilt að selja vörur undir kostnaðarverði. Verslanir Haga séu þær einu sem sé það óheimilt.

Í skriflegu svari til Stöðvar 2 sakar Guðmundur Costco um að stunda undirverðlagningu í stórum stíl. Bónus geti vegna markaðsstöðu sinnar ekki keppt við það. Þá hafnar hann því að gengisstyrking krónunnar hafi ekki skilað sér út í verðlag. Álagning fyrirtækisins hafi verið nánast óbreytt í fleiri ár. Gengisstyrkingin hafi hjálpað til við að halda verðlagi á dagvöru stöðugu frá árinu 2014 þrátt fyrir tugprósenta hækkun launa á sama tíma.

Gréta Margrét Grétarsdóttir, framkvæmdastjóri Krónunnar, segist fagna verðkönnun ASÍ sem sýnir lítinn mun á verði þar og í Krónunni. Vísir/Egill Aðalsteinsson

Engin ákvörðun um samkeppnisrannsókn

Fréttastofa gerði óvísindalega könnun á þremur vörutegundum: Kók Zeró, nýmjólk og Ristaurante-pítsu hjá Krónunni og Bónus.
Pítsan var þremur krónum ódýrari hjá Bónus en Krónunni og það sama átti við um nýmjólk. Kók Zero var einni krónu ódýrari í Bónus.
Kvörtun vegna mögulegs þöguls samráðs Krónunnar og Bónuss eru ekki til rannsóknar af hálfu Samkeppniseftirlitsins og engar ákvarðanir verið teknar um slíka rannsókn. Í skriflegu svari við fyrirspurn Stöðvar 2 segir Páll Gunnar Pálsson, forstjóri Samkeppniseftirlitsins, að stofnunin hafi hins vegar verið með dagvörumarkaðinn til rannsóknar í tengslum við samruna dagvöru- og eldsneytisfyrirtækja. Slík athugun standi enn yfir.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.