Innlent

„Réttardagurinn er miklu skemmtilegri en jólin,“ segir fjallkóngur Tungnamanna

Magnús Hlynur Hreiðarsson skrifar

Um fimm þúsund fjár voru í Tungnaréttum í morgun og annað eins af fólki í blíðskaparveðri. Fjallkóngur Tungnamanna segir réttardaginn miklu skemmtilegri en jólin.

Það var að sjálfsögðu flaggað við Tungnaréttir enda réttardagur í hverri sveit alltaf hátíðisdagur. Margt fé og fólk var í réttunum. Bændur voru sammála um að lömbin kæmu nokkuð misjöfn af fjalli, sum frekar rýr en önnur í góðum holdum. Eyvindur Magnús frá Kjóastöðum var að koma úr sinni fimmtugustu fjallferð.

„Það er reyndar svolítið öðruvísi en var hérna fyrst, aðbúnaðurinn og annað hefur breyst,“ segir Eyvindur. En eru menn eitthvað að staupa sig á fjalli ?

„Það er nú ekki eins nærri því mikið og var hérna áður, það hefur minnkað mikið eftir að bjórinn kom til sögunnar, hann skemmir fyrir okkur,“ segir Eyvindur hlægjandi.

Nýr sveitarstjóri Bláskógabyggðar, Ásta Stefánsdóttir var að koma í fyrsta skipti í Tungnaréttir.

„Hér er boðið upp á réttarsúpu víða og svo eru margir sem reka heim, þannig að þetta heldur áfram fram eftir degi.“

Guðrún Magnúsdóttir, fjallkóngur Tungnamanna segir réttardaginn miklu skemmtilegri en jólin þó hún fái enga pakka í réttunum.

„Já, miklu skemmtilegri, miklu skemmtilegri, þetta er jólapakkinn, féð heim af fjalli og hitta fólkið, það er pakkinn.“

Söngur er eitt af aðalsmerkjum Tungnarétta þar sem bændur og búalið taka sig saman og syngja raddað.

Sigurður Þorsteinsson, bóndi á Heiði sem verður 95 ára eftir nokkra daga stýrði söngnum í réttunum af mikilli röggsemi. Vísir/Magnús Hlynur Hreiðarsson.
Aldís Hafsteinsdóttir, bæjarstjóri Hveragerðisbæjar (t.v) og Ásta Stefánsdóttir, sveitarstjóri Bláskógabyggðar létu sig ekki vanta í réttirnar Vísir/Magnús Hlynur Hreiðarsson.
Vel var tekið á í söngnum eins og sjá má Vísir/Magnús Hlynur Hreiðarsson.
Íslenska fánanum var flaggað við Tungnaréttir í dag, enda réttardagur í hverri sveit alltaf hátíðisdagur. Um fimm þúsund fjár voru í réttunum og mikill mannfjöldi. Vísir/Magnús Hlynur Hreiðarsson.
Húðflúr Ólöfu Önnu Brynjarsdóttur á bænum Heiði í Biskupstungum vakti mikla athygli í réttunum en það er af hrúti, staðsett á bringunni á henni. „Ég auðvitað elska sauðfé og þaðan kemur hugmyndin. Þetta er enginn sérstakur hrútur, bara hrútskúpa“, segir Ólöf Anna. Vísir/Magnús Hlynur Hreiðarsson.


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.