Fótbolti

Fór fyrst í gallabuxur í 10. bekk og vildi fermast í HK-gallanum

Tómas Þór Þórðarson skrifar
Glódís Perla Viggósdóttir stendur vaktina í miðverðinum á morgun.
Glódís Perla Viggósdóttir stendur vaktina í miðverðinum á morgun. vísir/vilhelm

Glódís Perla Viggósdóttir, landsliðsmiðvörður í fótbolta, er klár í slaginn fyrir stóru stundina á Laugardalsvelli á morgun þegar að stelpurnar okkar mæta tvöföldum heimsmeisturum og áttföldum Evrópu Þýskalands í undankeppni HM 2019.

Eins og flestir vita tryggir íslenska liðið sér farseðilinn á HM í fyrsta sinn í sögunni með sigri en jafntefli eða tap þýðir að stelpurnar þurfa að vinna Tékkland á þriðjudaginn til að komast á HM eða í umspilið.

„Eins og við höfum oft sagt er það draumur að vera komin í þá stöðu að vera í bílstjórasætinu og eiga séns á að klára þetta fyrir framan fullan völl,“ segir Glódís Perla.

„Þetta er kannski ekki það sem maður bjóst við en var alltaf markmiðið okkar. Það er geggjað að þetta sé í okkar höndum. Það er líka geggjað að fá að upplifa fullan völl,“ segir Glódís Perla í ítarlegu viðtali við íþróttadeild sem má sjá í heild sinni hér neðst í fréttinni.

Glódís Perla mætir á æfingu með íslenska liðinu. vísir/vilhelm

Gott fyrir ungar stúlkur að sjá

Kvennalandsliðið hefur oft gert tilraun til að fylla völlinn og komst næst því í júní í fyrra þegar að 7.521 komu og sáu vináttuleik gegn Brasilíu sem var kveðjuleikur stelpnanna áður en að þær héldu á EM 2017.

Mætingin á leiki íslenska liðsins hefur verið stórgóð undanfarin þrjú ár eftir smá EM-þynnku árið 2014 og fagnar Glódís því sem og liðsfélagar hennar.

„Það er alveg geggjað hvað íslenska þjóðin stendur við bakið á okkur, körlunum og í raun öllum íslenskum íþróttamönnum. Þetta er alveg einstakt og eitthvað sem við munum klárlega nýta okkur inn á vellinum,“ segir hún.

Glódís er aðeins 23 ára gömul en hefur bæði spilað fyrir framan nokkur hundruð manns og nokkur þúsund. Hún kom kornung inn í landsliðið og hefur því bæði upplifað góða tíma og slæma.

„Það er gaman að hugsa til þess hvað ég fékk tækifærið snemma og er búin að vera hérna lengi og fengið að upplifa mikið. Það eru algjör forréttindi að sjá ungar stelpur mæta á laugardaginn og sjá fullan völl. Þær sjá að þetta er eitthvað sem þær geta upplifað ef þær halda áfram í fótbolta og komast í hæstu tröppu,“ segir Glódís Perla.

Glódís Perla ásamt systur sinni á móti á Sauðárkróki árið 2009. mynd/aðsend

Byrjaði seint en elskaði fótbolta strax

Miðvörðurinn magnaði, sem er uppalin hjá HK, spilaði sinn fyrsta meistaraflokksleik fyrir HK/Víking aðeins fjórtán ára gömul, ekki nema sex árum eftir að hún byrjaði að æfa fótbolta.

„Ég byrjaði ekki í fótbolta fyrr en að ég var átta ára þannig að ég byrjaði frekar seint. En, eftir að ég byrjaði varð ég algjör fótboltastelpa sem var alveg geggjað,“ segir Glódís sem hugsaði nánast bara um fótbolta eftir að hún byrjaði fyrst að rekja tuðruna á undan sér.

„Ég fór ekki í gallabuxur fyrr en að ég var í tíunda bekk og ég neitaði að mála mig. Ég ætlaði að fermast í HK-gallanum. Ég var alveg þar. Ég eyddi öllum mínum frítíma úti á velli í fótbolta. Svona man ég eftir æsku minni,“ segir Glódís og hlær og brosir.

Það er ekkert nýtt að Glódís brosi. Hún er alltaf brosandi, meira að segja inn á vellinum þegar að hún er í hörðu skallaeinvígi eða að jarða einhvern framherjann með rennitæklingu.

„Ég hef oft heyrt að þegar að ég geri eitthvað sem að mér finnst erfitt þá á ég það til að brosa. Ég var einu sinni að hlaupa í jójó-testi og einhver var að hlæja að mér því ég var brosandi vegna þess að ég var að deyja úr þreytu,“ segir hún.

„Ég myndi allavega ekki lýsa mér sem grimmri manneskju. Ég er frekar glöð almennt og ætli það endurspeglist ekki inn á fótboltavellinum,“ segir Glódís Perla.

Brosmild en kletthörð á velli. vísir/vilhelm

HM stærra en EM

Þýski landsliðsþjálfarinn hefur kallað sigur Íslands gegn Þýskalandi í fyrri leik liðanna frávik. Eitthvað sem í raun hefði ekki átt að gerast og mun ekki gerast aftur.

„Í leiknum sem að við spiluðum úti við Þýskaland eins og í öðrum leikjum þar sem að við náum flottum árangri þá erum við að spila fyrir hvora aðra,“ segir Glódís og hefur lítinn húmor fyrir orðum þýska þjálfarans.

„Þar erum við að henda okkur í allar tæklingar og erum þrjár fyrir boltanum. Ef einhver tapar tæklingu er næsta mætt. Svona viljum við spila. Þetta er einkenni okkar. Ef þýski þjálfarinn hefur ekki leikgreint okkur betur en þetta er það bara fínt,“ segir hún.

Íslensku strákarnir töluðu um það að HM væri stærra en EM þegar að þeir tryggðu sér þátttökuréttinn og töluðu oft um það úti í Rússlandi. Tilfinningin er eins hjá stelpunum.

„Þetta er klárlega stærra. Þetta er stærra mót og stærri vettvangur. Þetta er alveg ruglað. Maður pældi ekki einu sinni í þessu sem krakki. Þegar ég er ung að alast upp er Ísland að fara í fyrsta sinn á EM 2009 en ég sem krakki upplifði aldrei að sjá þetta gerast. Það er alveg magnað að eiga möguleika á þessu,“ segir Glódís Perla Viggósdóttir.

Allt viðtalið má sjá í spilaranum hér að neðan.


Tengdar fréttir

Við erum á góðri vegferð

Íslenska kvennalandsliðið í fótbolta getur tryggt sér sæti á HM með sigri á Þýskalandi á morgun. Hallbera Guðný Gísladóttir segir tilhlökkunina í íslenska hópnum fyrir leiknum mikla en veit að verkefnið er ærið.

Við höfum verið lengi með augun á Þýskalandsleiknum

Íslenska kvennalandsliðið í fótbolta getur tryggt sér sæti á HM 2019 með sigri á Þýskalandi á laugardaginn. Glódís Perla Viggósdóttir segist hafa beðið leiksins með mikilli eftirvæntingu. Hún er meðvituð um styrkleika þýska liðsins.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.