Liverpool áfram með fullt hús

Liverpool er áfram með fullt hús stiga eftir sigur á Leicester í fyrsta leik helgarinnar í ensku úrvalsdeildinni.

Leikurinn byrjaði fjörlega og komst Liverpool í dauða færi strax í upphafi leiks. Roberto Firmino náði ekki nógu góðu skoti á markið og Kasper Schmeichel varði frá honum. Mohamed Salah setti frákastið framhjá markinu.

Sadio Mane gerði hins vegar engin mistök nokkrum mínútum seinna þegar Andrew Robertson fann hann í teignum, Liverpool komið yfir eftir tíu mínútur.

Leicester komst betur inn í leikinn þegar líða tók á fyrri hálfleikinn en það var Roberto Firmino sem skoraði annað mark Liverpool gegn gangi leiksins. Hann var einn á auðum sjó inni á teignum eftir hornspyrnu James Milner og skallaði boltann í netið.

Leikurinn var líflegur í upphafi seinni hálfleiks og áttu bæði lið færi til þess að skora mark. Liverpool hafði ekki fengið á sig mark fyrir leikinn og nýi markmaður þeirra, Alisson Becker, ákvað að breyta því og gefa Leicester mark og líflínu í leiknum.

Í stað þess að spyrna frá marki ætlaði hann að leika á Kelechi Iheanacho. Það mistókst hins vegar og náði Leicester-maðurinn boltanum auðveldlega af Brasilíumanninum, lagði boltann á Rachid Ghezzal sem skoraði í autt markið. Ghezzal fékk mark í fyrsta byrjunarliðsleik sínum í ensku úrvalsdeildinni.

Leicester náði ekki að setja annað mark í leiknum og Liverpool fór með sigur af hólmi.

Liverpool er eins og áður segir með 12 stig úr fyrstu fjórum leikjum sínum. Leicester er með sex stig.