Innlent

Stefáns Karls minnst um allan heim

Kolbeinn Tumi Daðason skrifar
Stefán Karl Stefánsson kom fólki til að hlæja og nýtti sömuleiðis reynslu sína til að vinna gegn einelti.
Stefán Karl Stefánsson kom fólki til að hlæja og nýtti sömuleiðis reynslu sína til að vinna gegn einelti. Vísir/Andri Marinó

Óhætt er að segja að Stefán Karl Stefánsson leikari hafi snert hjörtu þjóðarinnar undanfarin ár. Stefán Karl féll frá í gær en leikarinn 43 ára hafði barist við illvígt gallgangakrabbamein í tvö ár.


Samúðarkveðjum og minningarorðum rignir á samfélagsmiðlum, hvort sem er á Facebook, Instagram eða Twitter, og jafnt frá samferðafólki hans í listaheiminum, æskuvinir eða fólk sem þekkti hann ekki persónulega en hann hafði áhrif á.

„Hann var stórkostlegur listamaður og ég varð þess heiðurs aðnjótandi að vinna nokkrum sinnum með honum og okkur varð vel til vina. Framlag hans til menningarmála og eineltisumræðunnar verður seint fullþakkað,“ segir píanóleikarinn Jón Ólafsson.




„Ég var þeirra gæfu aðnjótandi að kynnast honum þegar við vorum ráðin í Litlu Hryllingsbúðina í Borgarleikhúsinu árið 1999. Það var hans fyrsta stóra hlutverk eftir útskrift og mín fyrstu spor í leikhúsi. Tannlæknirinn og öll hlutverkin sem hann skellti sér í að okkur fannst áreynslulaust er ógleymanlegt og finnst mér ég hafa verið heppin að hafa fengið að vera samferða honum. Innilegar samúðarkveðjur til fjölskyldu hans,“ segir söngkonan Regína Ósk.




Birgitta Jónsdóttir, fyrrverandi þingmaður pírata, segir að heimurinn hafi skyndilega orðið fátækari.

„Stefán Karl var fyndnasti maður sem ég hef kynnst, svo ótrúlega skapandi í hugsun og tilbúinn að berjast fyrir réttindum annarra. Hann var fyrirmynd fjölda fólks út um allan heim. Hann kom vandamálum þeim er tengjast einelti í umræðuna, þegar lítið var að gert í þeim málaflokki. En síðast en ekki síst var svo fallegt og gefandi að fylgjast með honum sem fjölskylduföður og hinu fallega sambandi sem hann og Steina höfðu þróað og ræktað.“


Söngvarinn og eftirherman Eyþór Ingi Gunnlaugsson segist hafa legið í kasti í hvert skipti sem hann hitti Stefán. Svo fyndinn hafi hann verið.

„Comical Genius á heimsmælihvarða og ekki bara það heldur frábær söngvari , eftirherma , leikari og með eindæmum góð sál. Listamaður sem ég leit og lít en upp til. Elsku Stefan minn ég er enþá á leiðini í kaffi. Ég skammast mín svoltið fyrir það. Ég var og er lika enþá að bíða eftir einhverju kraftaverki. Ég var heppinn að fá að kynnast Þér aðeins og við unnum líka aðeins samann. Ég naut þess og lærði mikið af þvi. Takk fyrir peppið , vinskapinn , athyglisbrestin, húmorinn og listina. Þetta er mikill missir.“


Ólafur Darri Ólafsson leikari segir erfitt að hugsa sér heiminn án Stebba, hans verði sárt saknað. Hann sendir fjölskyldu Stefáns Karls samúðarkveðjur líkt og Hildur Eir Bolladóttir prestur.

„Stefán var einstaklega hæfileikaríkur leikari og kraftmikil og sjarmerandi manneskja, eitthvað óvenju heiðarlegt og fallegt við framgöngu hans hvort sem var á sviði eða hvar sem hann lét til sín taka í þjóðlífinu. Í veikindunum gaf hann okkur sem álengdar stóðum dýrmæta gjöf, hann talaði nefnilega um dauðann eins og dauðinn á skilið, af hispursleysi og húmor og þannig setti hann lífið og vonina í forgang okkur til huggunar og blessunar. Takk Stefán Karl,“ segir Hildur Eir.




Helga Vala Helgadóttir, þingkona Samfylkingarinnar, þakkar fyrir sig.

„Takk fyrir allt þitt örlæti og endalausa mannúð sem þú sýndir á svo mörgum sviðum. Takk fyrir listina og húmorinn.“

Jóna Hrönn Bolladóttir prestur kynntist Stefáni í gegnum samtökin Regnbogabörn.

„Ég var svo lánsöm þegar ég þjónaði sem miðborgarprestur að Stefán fékk mig í stjórn Regnbogabarna. Það var hreint frábært að starfa með honum að þessum mikilvæga málflokki, þvílíkar hugsjónir, kraftur og einlægni. Við áttum djúp samtöl um afleiðingar eineltis og jaðarsetningar á fólki. Samstaða hans og skilningur var fölvskalaus og það var ekki hægt annað en að hrífast með og leggja sitt á vogaskálarnar. Ég er þakklát fyrir persónu hans, líf, list og ekki síst hugsjónir.“


Gísli Marteinn Baldursson sjónvarpsmaður minnist þess þegar hann kynntist Stefáni Karli þegar hann var enn í leiklistarskólanum.

„Rúnar Freyr Gíslason kom með Stefán eins og stormsveip inn í vinahópinn með sínar eftirhermur, orku og hæfileika sem við vorum svo heppin að fá að sjá þróast og marga karakterana enda á sviði Þjóðleikhússins, í skaupum eða á Broadway. Við höfðum aldrei séð neitt þessu líkt áður og munum því miður aldrei sjá þetta aftur. Hvíl í friði gamli vin.“



Mikill fjöldi erlendra aðdáenda minnist Stefáns Karls sömuleiðis og fjallað hefur verið um andlát hans í stærstu miðlum heimsins.




Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.