Innlent

Isavia lét fjarlægja auglýsingu gegn sjókvíaeldi í Leifsstöð

Aðalheiður Ámundadóttir skrifar
Skiltið hékk í innritunarsal Leifsstöðvar í tíu daga en var þá tekið niður að ákvörðun Isavia. Ákvörðun sem kom Icelandic Wildlife Fund mjög á óvart.
Skiltið hékk í innritunarsal Leifsstöðvar í tíu daga en var þá tekið niður að ákvörðun Isavia. Ákvörðun sem kom Icelandic Wildlife Fund mjög á óvart. IWF

Icelandic Wildlife Fund, sem berst meðal annars gegn vexti sjókvíaeldis hér á landi, hefur vísað ákvörðun Isavia um að fjarlægja auglýsingaskilti sem sjóðurinn fékk sett upp í Leifsstöð 17. júlí síðastliðinn, til siðanefndar Sambands íslenskra auglýsingastofa (SÍA).

Skiltið hékk í innritunarsal flugstöðvarinnar í 10 daga en var þá fjarlægt.

„Isavia hefur lagt höfuðáherslu á að þær auglýsingar sem eru í flugstöðinni séu fyrst og fremst miðaðar að því að auglýsa vöru og þjónustu en séu ekki auglýsingar um álitamál þar sem tveir hópar eru að takast á um umdeild málefni. Þess vegna hefur Isavia lagt áherslu á að auglýsingar séu bornar undir starfsmenn áður en þær eru settar upp,“ segir Guðjón Helgason, upplýsingafulltrúi Isavia.

Guðjón Helgason upplýsingafulltrúi ISAVIA. Óli Haukur

Hann segir auglýsinguna hafa verið keypta af birtingahúsi og því hafi Isavia aldrei átt í neinum samskiptum við starfsmenn sjóðsins. Auglýsingin hafi ekki verið borin undir Isavia eins og reglur segi til um og eftir að starfsmenn vallarins hafi tekið eftir því að ósamþykkt auglýsing hafi verið komin upp á vegg hafi hún verið tekin niður og í kjölfarið farið yfir efni hennar. Starfsmanni birtingahússins hafi verið tilkynnt að auglýsingin hefði verið tekin niður sama dag og það var gert.

Guðjón segir alls ekki algengt að auglýsingar séu teknar niður í flugstöðinni. Engin sérstök ritskoðunarnefnd starfi hjá fyrirtækinu heldur fari starfsfólk yfir auglýsingar sem komi inn. Siðareglur SÍA séu meðal þess sem haft er til hliðsjónar við mat á auglýsingum og lögð áhersla á að upplýsingar í þeim séu ekki rangar og í þeim sé hvorki vegið að öðru fólki eða fyrirtækjum.

Aðspurður segir Guðjón auglýsingu í umræddu plássi kosta á bilinu 300.000 til 350.000 kr. á mánuði.

Jón Kaldal, talsmaður Icelandic Wildlife Fund. Fréttablaðið/ERNIR

„Það kom okkur mjög á óvart að Isavia skyldi ákveða að taka auglýsinguna niður með þeim rökstuðningi að félagið vildi ekki dragast inn í deilur milli tveggja aðila. Þetta þótti okkur einkennilegt því fulltrúar Isavia sögðu okkur líka að engin athugasemd hefði borist við auglýsinguna, heldur hefðu þau ákveðið að taka hana niður að eigin frumkvæði. Eðlilega bentum við á að Icelandic Wildlife Fund ætti ekki í deilum við neinn um efni auglýsingarinnar og Isavia gæti því dregist inn í deilur sem eru ekki til,“ segir Jón Kaldal, talsmaður Icelandic Wildlife Fund.

Jón segir texta auglýsingarinnar byggja á óumdeildum vísindalegum staðreyndum um neikvæð áhrif stórfellds laxeldis í opnum sjókvíum á umhverfið og lífríkið og að auglýsingin beinist hvorki að nafngreindum fyrirtækjum né sé fólk hvatt til að sniðganga tilteknar vörur.

„Þetta er eins og að taka niður auglýsingar sem hvetja til notkunar á grænum orkugjöfum til að draga úr loftslagsbreytingum af mannavöldum, með þeim rökum að Isavia telji þær „meiðandi“ fyrir olíuiðnaðinn í heiminum.“ 

Niðurstöðu siðanefndarinnar er að vænta í næstu viku. 


Tengdar fréttir

Arnarlax á leið í norsku kauphöllina

Arnarlax hefur tryggt sér tólf prósenta hlutafjáraukningu að virði 2,6 milljarðar íslenskra króna en hún hefur í för með sér að fyrirtækið verði skráð á hlutabréfamarkað í Noregi innan tveggja ára. Kjartan Ólafsson stjórnarformaður segir mikil vaxtartækifæri fyrir hendi.

Reka ferðamenn frá sjókvíunum

Lögreglumenn á eftirlitsbátum þurfa reglulega að reka sjóstangaveiðimenn í burtu frá laxeldiskvíum við strendur Noregs.

Veitingahús á móti sjókvíaeldi

Nokkur veitingahús í Reykjavík sniðganga lax úr sjókvíaeldi og taka þátt í baráttu gegn slíkri framleiðslu. Hrefna Sætran, kokkur og veitingahúsaeigandi, segir viðskiptavini sína spá í hvaðan fiskurinn kemur.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.