Handbolti

Dagur fékk hjálp frá Írökum og íslensku þjálfarnir mætast í undanúrslitunum

Óskar Ófeigur Jónsson skrifar
Dagur Sigurðsspn, þjálfari japanska landsliðsins.
Dagur Sigurðsspn, þjálfari japanska landsliðsins. Vísir/Getty
Það verður íslenskur þjálfaraslagur í undanúrslitum í handboltakeppni Asíuleikanna en þetta varð ljóst þegar keppni lauk í milliriðlum í dag. Asíuleikarnir fara fram þessa daganna á Jakarta í Indónesíu.

Japanir fengu skell í síðasta leiknum sínum í milliriðlinum en fyrir leikinn var það ljóst að japanska liðið var komið í undanúrslitin hvernig sem leikurinn færi.

Barein mætir Japan í undanúrslitum keppninnar en Aron Kristjánsson þjálfar lið Barein og Dagur Sigurðsson er þjálfari japanska liðsins. Með þessu er líka öruggt að íslenskur þjálfari vinnur til verðlauna á þessum Asíuleikum.

Barein er búið að vinna alla sex leiki sína í keppninni og vann sinn milliriðil sannfærandi. Japanska liðið þurfti aftur á móti að fá smá hjálp frá Írak til að komast í undanúrslitin.

Írak tók stig af Sádí Arabíu í lokaumferðinni og þess vegna mátti Japan tapa lokaleiknum sínum á móti Katar.

Írak jafnaði metin tæpum tveimur mínútum fyrir leikslok og Sádarnir fengu tvær sóknir til að tryggja sér sigurinn en án árangurs. Japanska liðið var því í raun eini sigurvegarinnar í þeim leik.

Til að sleppa við Barein í undanúrslitunum hefðu Japanir hins vegar þurft að vinna lokaleikinn á móti Katar.

Katar vann Japan 24-17 eftir að hafa verið þremur mörkum yfir í hálfleik, 13-10. Japanska liðið hafði litlu að keppa eftir að þeir misstu Katarbúa fram úr sér í seinni hálfleik og munurinn var á endanum sjö mörk.

Undanúrslitaleikirnir fara fram 27. ágúst og liðin fá því þrjá daga til að undirbúa sig. Í hinum undanúrslitaleiknum mætast Katar og Suður-Kórea.


Tengdar fréttir

Strákarnir hans Arons unnu 24 marka sigur

Sigurganga landsliðs Barein hélt áfram í morgun á Asíuleikunum í handbolta en liðið var fyrir leikinn búið að tryggja sér sæti í úrslitaleiknum.




Fleiri fréttir

Sjá meira


×