Erlent

Styttu Steinunnar stolið af bekk í Louisiana

Atli Ísleifsson skrifar
22 styttum Steinunnar Þórarinsdóttur var komið fyrir víðs vegar um miðborg Baton Rouge á síðasta ári.
22 styttum Steinunnar Þórarinsdóttur var komið fyrir víðs vegar um miðborg Baton Rouge á síðasta ári. Fréttablaðið/Andri Marinó

Lögregla í Louisiana í Bandaríkjunum rannsakar nú stuld á styttu íslensku listakonunnar Steinunnar Þórarinsdóttur í höfuðborg ríkisins Baton Rouge.

Styttan var á bekk í miðborg Baton Rouge og var ein 22 sambærilegra stytta sem var hluti af listaverki Steinunnar, Landamæri, eða Borders.

Í frétt WBRZ2 kemur fram að styttan sé rúmlega 180 kíló að þyngd og telur lögregla að henni hafi verið stolið í mars eða apríl fyrr á þessu ári. Fyrst var tekið eftir stuldinum þegar til stóð að flytja verkið til borgarinnar Shreveport, einnig í Louisiana.

Verkinu er ætlað að varpa ljósi á menningarlegan, pólitískan og félagslegan fjölbreytileika.


Haft samband við tökulið myndar Tom Hanks

Eftir að upp komst að styttan væri horfin var haft samband við aðstandendur kvikmyndarinnar Greyhound, sem skartar Tom Hanks í aðalhlutverki, en tökur á myndinni fóru meðal annars fram nálægt bekknum þar sem styttan var og um það leyti sem hún á að hafa horfið. Þeir kváðust þó ekkert vita um hvarf styttunnar.

Yfirvöld í Baton Rouge hafa einnig haft samband við Steinunni sem sögð er hafa miklar áhyggur af stuldinum enda er styttan hluti sýningar hennar. Takist ekki að hafa upp á styttunni þurfa borgaryfirvöld að greiða 60 þúsund dala tryggingu, tæplega 6,5 milljónir króna á núvirði.

Uppsetning verksins var kostuð af einkaaðilum og var ekkert fé sótt í opinbera sjóði borgarinnar, að því er fram kemur í frétt WBRZ2.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.