Enski boltinn

Spjaldtölvur á hliðarlínunni og harðar tekið á mótmælum knattspyrnustjóra

Ástrós Ýr Eggertsdóttir skrifar
Jose Mourinho var rekinn upp í stúku í leik Southampton og Manchester United á síðasta tímabili. Hann þarf að passa sig enn frekar á hliðarlínunni í vetur
Jose Mourinho var rekinn upp í stúku í leik Southampton og Manchester United á síðasta tímabili. Hann þarf að passa sig enn frekar á hliðarlínunni í vetur Vísir/Getty

Enska úrvalsdeildin hefst í kvöld þegar Manchester United tekur á móti Leicester í opnunarleiknum á Old Trafford. Eins og fyrir flest tímabil eru nokkrar reglubreytingar sem hafa tekið gildi yfir sumarið.

Það verður tekið harðar á hegðun knattspyrnustjóranna á hliðarlínunni. Dómararnir munu ekki geta gefið stjórunum spjöld en þeir gefa viðvaranir. Fjórar viðvaranir þýða eins leiks bann, átta eru tveggja leikja bann og svo framvegis.

Bönn leikmanna breytast aðeins. Gul spjöld færast ekki á milli keppna; gult í úrvalsdeildinni telur ekki upp í bann í bikarkeppninni. Fimm uppsöfnuð gul spjöld þýða eins leiks bann. Rauð spjöld gilda hins vegar á allar keppnir, rautt í úrvalsdeildarleik þýðir bann í næsta leik á vegum enska knattspyrnusambandsins, sama í hvaða keppni það er.

Stærsta breytingin er líklega sú að nú má þjálfarateymið vera með spjaldtölvur eða snjallsíma á hliðarlínunni. Tækin verða notuð til þess að fara yfir klippur úr leiknum með varamönnum og skoða tölfræði og þess háttar.

Rauð spjöld halda áfram að gefa leikbönn í öllum keppnum enska knattspyrnusambandsins. Hægt verður að áfrýja lengd einstakra banna. vísir/getty

Þá verður ekki leyfilegt að nota þau til þess að rífast við dómarann um ákvarðanir, til dæmis vítaspyrnur sem ekki voru gefnar en endursýningar sýna að hefðu átt að standa. Myndbandstækni verður nefnilega ekki notuð í ensku deildunum.

Myndbandstæknin virkaði nokkuð vel á heimsmeistaramótinu í Rússlandi en forráðamenn ensku úrvalsdeildarinnar vilja ekki taka hana í notkun strax. Hún verður hins vegar notuð í öllum bikarleikjum á Englandi sem fara fram á úrvalsdeildarvöllum.

Í deildarbikarnum verður hætt að notast við framlengingar, leikir sem enda í jafntefli fara beint í vítaspyrnukeppni. Þá fer vítaspyrnukeppnin aftur í hefðbundið ABAB fyrirkomulag og hætt að notast við ABBA.

Félagsskiptaglugginn á Englandi lokaði í gær, í fyrsta skipti sem hann lokar áður en tímabilið hefst en ekki um mánaðarmótin. Liðin munu ræða þessa breytingu á næstu mánuðum.

Leikur Manchester United og Leicester verður í beinni útsendingu á Stöð 2 Sport frá klukkan 18:50. Þrír leikir verða í beinni útsendingu á laugardag og tveir á sunnudag, þar á meðal stórleikur Arsenal og Manchester City.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.