Innlent

Borgin kaupir skólagögn fyrir 40 milljónir

Atli Ísleifsson skrifar

Ekki verða gefnir út innkaupalistar fyrir nemendur í grunnskólum Reykjavíkur vegna næsta skólaárs. Nemendur muni því fá þau skólagögn sem þeir þurfa þegar þeir mæta í skólann þann 22. ágúst. Reykjavíkurborg gekk til samninga við A4, en tilboð þeirra nam 40 milljónum króna.

Í frétt á vef borgarinnar segir að þann 6. desember 2017 hafi borgarstjórn Reykjavíkur samþykkt að námsgögn sem nemendur noti á skólatíma skyldu verða þeim og fjölskyldum þeirra að kostnaðarlausu frá og með skólaárinu 2018-2019. 

„Byggði sú samþykkt m.a. á tilmælum frá foreldrafélögum skólanna og Samtökum foreldrafélaga grunnskólabarna í Reykjavík (SAMFOK). Slíkt fyrirkomulag sparar bæði fé og tíma, er umhverfisvænna og stuðlar að betri nýtingu skólagagna.

Þau skólagögn sem nemendur fá endurgjaldslaust eru m.a. stílabækur, reikningsbækur, möppur, vinnubækur, vinnubókarblöð, pappír, ritföng, litir, vasareiknir og fl. Gæðanefnd skipuð skólastjórum og fulltrúum þeirra útbjó gæðakröfur sem gerðar voru til þeirra skólagagna sem boðin voru út.  A4 átti lægsta tilboðið og var því gengið  til samninga við fyrirtækið. Nam tilboð þeirra í skólagögn um 40 milljónum króna. 

Talsverð undirbúningsvinna fylgdi þessu útboði á vegum borgarinnar og hér er um lærdómsferli að ræða sem nýtist áfram þegar útboð á þessum vörum fer fram fyrir skólaárið 2019-20,“ segir í fréttinni.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.