Bílar

A-Class Sedan klýfur vindinn best

Finnur Orri Thorlacius skrifar
Mercedes Benz eyddi miklum tíma í vindgöngum til að ná niður vindstuðlinum.
Mercedes Benz eyddi miklum tíma í vindgöngum til að ná niður vindstuðlinum.

Mercedes Benz hefur þegar kynnt Sedan-útfærslu nýs A-Class í Kína og styttast fer í kynningu bílsins fyrir Evrópumarkað. Þessi nýja útfærsla A-Class státar af lægsta vindstuðli fólksbíls í heiminum en hann er með „drag coefficient“ upp á aðeins 0,22. Reyndar er Volkswagen XL1 bíllinn með vindstuðulinn 0,19 en sá bíll var aðeins framleiddur í 250 eintökum og telst því ekki fjöldaframleiddur bíll. Því á A-Class Sedan-titilinn sem stendur.

Mercedes Benz ætlar að kynna þennan nýja A-Class Sedan í Evrópu nálægt árslokum og hann verður einnig í boði í Bandaríkjunum, en Mercedes Benz hefur hingað til ekki boðið A-Class þarlendis vegna þess að Benz hefur hingað til talið að svo lítill bíll eigi ekki erindi á markað þar sem kaupendur velja sér yfirleitt stærri bíla.

Mercedes Benz eyddi miklum tíma í vindgöngum til að ná niður vindstuðli A-Class Sedan-bílsins og meira að segja dekkin undir bílnum eru sérhönnuð í því augnamiði að ná niður vindstuðlinum. Mercedes Benz á sín eigin vindgöng í verksmiðju sinni í Sindelfingen í Þýskalandi, en bíllinn verður hins vegar smíðaður í verksmiðju Benz í Rastatt og í verksmiðju Benz í Aguascalientes í Mexíkó og munu bílarnir sem þar eru smíðaðir að stærstum hluta enda á Bandaríkjamarkaði.

Mercedes Benz segir að A-Class Sedan verði með mesta höfuðrými bíls í þeim stærðarflokki sem bíllinn tilheyrir.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.