Umfjöllun og viðtöl: Valur - Grindavík 3-0 │Loksins náði Valur í sigur

Ástrós Ýr Eggertsdóttir skrifar
vísir/ernir
Valur náði loks að vinna sigur í Pepsi deild kvenna þegar Grindavík mætti á teppið á Hlíðarenda. Fyrir leikinn hafði Valur ekki unnið síðan í lok júní.

Heimakonur í Val voru sterkari frá upphafi. Þær sóttu stíft og voru ógnandi en það vantaði aðeins upp á síðustu sendingarnar og skotin í fyrri hálfleik. Grindvíkingar náðu ekki mikið að sækja og áttu aðeins eitt eða tvö færi í fyrri hálfleik.

Snemma í seinni hálfleik náðu Valskonur að brjóta ísinn og það var Crystal Thomas sem skoraði á 50. mínútu.

Aðeins tveimur mínútum seinna var dæmd vítaspyrna á Grindavík. Viviane Domingues braut á Elínu Mettu Jensen og réttilega dæmt víti. Elín fór sjálf á punktinn og skoraði af öryggi.

Brekkan orðin mjög brött fyrir Grindvíkinga sem gerðu sig aldrei líklegar til þess að klifra hana. Elín Metta kláraði svo leikinn á 79. mínútu eftir frábæran sprett Fanndísar Friðriksdóttur. Sanngjarn 3-0 sigur Vals.

Af hverju vann Valur?

Valskonur hafa verið nokkuð mikið í því að sækja án árangurs í síðustu leikjum. Í kvöld náðu þær loks að nýta færin sín. Þess má þó geta að fyrirstaðan var ekki mikil, Grindavíkurliðið varðist ágætlega en gerði sig aldrei líklegt til afreka fram á við.

Hverjar stóðu upp úr?

Hlín Eiríksdóttir átti frábæran leik í liði Vals, líklega hennar besta í sumar. Hún lék á alls oddi og vantaði bara að bæta markinu við til þess að fullkomna leikinn. Elín Metta átti einnig mjög góðan leik sem og fleiri í Valsliðnu sem spilaði heilt yfir vel.

Hvað gekk illa?

Grindavík gekk illa að koma sér í sókn. Valsliðið lá á þeim allan leikinn og uppskar eftir því. Varnarleikurinn var ágætur en það er erfitt að verjast í 90 mínútur án þess að fá á sig mark.

Hvað gerist næst?

Valur á leik gegn HK/Víking föstudaginn 10. ágúst. Á sama tíma fá Grindvíkingar Stjörnuna í heimsókn.

Pétur: Frábær leikur hjá stelpunum

„Mér fannst þetta frábær leikur hjá okkur, besti leikurinn í sumar,“ sagði ánægður Pétur Pétursson, þjálfari Vals, eftir leikinn.

„Ég var mjög ánægður með það hvernig boltinn gekk og hvernig við spiluðum, gleðina úti á velli. Á móti liði sem spilaði mjög stífa vörn en ég var mjög ánægður með stelpurnar, frábær leikur hjá þeim.“

Færanýting Vals hefur verið vandamál í síðustu leikjum en mörkin komu loks í dag.

„Við hefðum getað skorað fleiri mörk í hinum leikjunum þó við höfum tapað þeim eða gert jafntefli. Í dag þá klára þær þetta mjög vel.“

„Mér fannst liðið sína hvað það getur, hvernig það getur spilað fótbolta. Einnar snertingar fótbolti og mikið af færum og sóknum. Við spiluðum líka góða vörn og ég var bara rosalega stoltur af liðinu,“ sagði Pétur Pétursson.

Elín Metta: Hefði verið til í þriðja markið

„Ég var mjög ánægð með leikinn hjá mér, sem og öllu liðnu, og má eiginlega segja að Fanndís hafi búið til seinna markið mitt og ég er henni þakklát fyrir það en ég hefði alveg verið til í að bæta við einu,“ sagði Elín Metta Jensen í leikslok.

Það hefur gengið illa fyrir Val að ná í sigra að undanförnu og því mikilvægt að ná sigrinum í þessum leik

„Maður verður að vera fljótur að gleyma og halda áfram. Það er ekkert annað í boði. Við ákváðum fyrir leikinn í dag að vera jákvæðar og peppa hvor aðra og það gekk vel í dag. Við ætlum alveg örugglega að halda því áfram.“

„Mér fannst við ná að láta boltann ganga hratt og ná að setja hann í miðjusvæðið sem hefur ekki alltaf gengið upp hjá okkur í sumar. Mér fannst það vera að skila sér,“ sagði Elín Metta Jensen.

Bein lýsing

Leikirnir






    Fleiri fréttir

    Sjá meira