Innlent

Maður í lífshættu eftir hnífsstungu á Akranesi

Gissur Sigurðsson skrifar
Árásin varð á Akranesi í nótt.
Árásin varð á Akranesi í nótt. Vísir/Arnar Halldórsson

Karlmaður var hætt kominn eftir að annar karlmaður stakk hann með hnífi í heimahúsi á Akranesi í nótt. Sá fyrrnefndi missti mikið blóð og í stað þess að flytja hann á sjúkrahúsið á Akranesi var hann fluttur með forgangi á slysadeild Landspítalans þar sem hann gekkst undir aðgerð og er nú kominn á gjörgæsludeild.

Atburðarásin er nokkuð óljós að sögn Jóns Ólafssonar yfirlögregluþjóns í lögreglunni á Vesturlandi.

Það var á öðrum tímanum í nótt sem tilkynning barst frá sjúkrahúsinu á Akranesi. Þangað hafði maður leitað aðstoðar og var með áverka eftir átök. Þegar læknirinn þurfti að bregða sér frá rann einhverskonar æði á manninn og braut hann ýmsa hluti á útleiðinni og hvarf.

Í framhaldinu barst tilkynning um mikið blóðugan mann í heimahúsi skammt frá spítalanum. Hafði lögreglan samband við fjarskiptastöð lögreglunnar í Reykjavík sem sendi tvo mannaða lögreglubíla áleiðis upp á Skaga. Voru sérsveitarmenn í öðrum þeirra, en þegar til kom sýndi grunaður árásarmaður engan mótþróa og var aðstoðin afturkölluð.

Strax kom í ljós að þolandinn var lífshættulega særður svo hann var fluttur beint á Landspítalann, enda var hann talinn í bráðri lífshættu að sögn Jóns Ólafssonar yfirlögregluþjóns. Árásarmaðurinn er í vörslu lögreglu. Ekki hefur verið tekin ákvörðun um hvort krafist verður gæsluvarðhalds yfir honum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.