Innlent

Þurrt í höfuðborginni á morgun

Stefán Ó. Jónsson skrifar
Hver veit nema fólk safnist saman á Austuvelli á morgun.
Hver veit nema fólk safnist saman á Austuvelli á morgun. vísir/Daníel

Veðurstofan útilokar ekki að allur morgundagurinn gæti verið þurr á suðvesturhorninu. Það verður að teljast til stórtíðinda ef tekið er mið af veðurfarinu á höfuðborgarsvæðinu í sumar.

Það verði hins vegar suðvestlæg átt í dag og víða skúrir, þó síst norðantil þar sem jafnframt verður hlýjast. Hitinn verður að jafnaði á bilinu 8 til 16 stig í dag.

Það snýst svo í hvassa austlæga átt við suðausturströndina í fyrramálið. Þar má einnig gera ráð fyrir einhverri rigningu. Það muni hins vegar lægja þegar líður á daginn og draga úr vætu.

Að sama skapi gæti verið úrkomulaust á Suðvesturlandi allan morgundaginn sem fyrr segir. Þar að auki verður þar að finna hæstu hitatölurnar þann daginn og gæti hitinn numið 18 gráðum þegar mest lætur.

Það er svo útlit fyrir „rólegheita dag“ á föstudag og verðu víða nokkuð hlýtt, síst þó á norðanverðum Vestfjörðum. Ný lægð mun svo gera sig heimakomna á laugardag með vætu um allt land.

Veðurhorfur á landinu næstu daga

Á fimmtudag:
Gengur í austan- og norðaustan 8-18 m/s, hvassast við SA-ströndina. Talsverð rigning S- og A-til, annars úrkomuminna, en dregur úr vindi og úrkomu um kvöldið. Hiti 9 til 17 stig, hlýjast V-lands. 

Á föstudag:
Austlæg eða breytileg átt, 3-8 m/s og rigning á köflum við A-ströndina og á Vestfjörðum framan af degi, en annars þurrt að kalla. Hiti 8 til 18 stig, svalast á Vestfjörðum. 

Á laugardag:
Austlæg átt og og rigning, en milt veður. 

Á sunnudag, mánudag og þriðjudag:
Útlit fyrir austlægar áttir með vætu í flestum landshlutum, en fremur hlýtt í veðri.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.