Innlent

Endurskoði leigu á þyrlum til Gæslunnar

Garðar Örn Úlfarsson skrifar
Starfsfólk olíuborpalla á Norðursjó vantreystir enn Super Puma H225 þyrlunni eftir mannskæð slys.
Starfsfólk olíuborpalla á Norðursjó vantreystir enn Super Puma H225 þyrlunni eftir mannskæð slys. Vísir/AFP

„Afstaða okkar er sú að Landhelgisgæslan getur aldrei leyft sér neitt annað heldur en að nota vélar sem hafa óvefengjanlegt orðspor,“ segir Ingvar Tryggvason, formaður öryggisnefndar Félags íslenskra atvinnuflugmanna.

Eins og kom fram í Fréttablaðinu í gær fórst herþyrla í síðustu viku í Suður-Kóreu er spaðarnir losnuðu ofan af henni. Það sama gerðist í tveimur stórslysum, í Noregi 2016 og í Skotlandi 2009. Þá var um að ræða Super Puma þyrlur frá Airbus. Síðarnefndu tvö slysin voru rakin til galla í gírkassa vélanna. Sams konar gírkassi frá Airbus var í þyrlunni sem hrapaði í Suður-Kóreu enda var sú þyrlutegund kyrrsett í kjölfar slyssins í Noregi 2016.

Norska flugslysanefndin segir að þennan gírkassa þurfi að endurhanna, jafnvel þótt Airbus hefði gert á honum endurbætur. Landhelgisgæsla Íslands hefur samið um leigu á tveimur Super Puma þyrlum með slíkum gírkössum.

„Við höfum verið að afla okkur upplýsinga um þetta, sérstaklega eftir þennan óskaplega atburð í Suður-Kóreu. Ég reikna með að þeir hjá Landhelgisgæslunni endurmeti stöðuna eftir þetta,“ segir Ingvar Tryggvason.

Ingvar Tryggvason, formaður öryggisnefndar Félags íslenskra atvinnuflugmanna.

 „Við viljum fyrst og fremst taka ákvarðanir út frá haldbærum gögnum en ekki tilfinningum eða flökkusögum. Ef á þarf að halda þá beitum við okkur frekar.“

Í tilefni af þyrluslysinu í Suður-Kóreu spurðist Fréttablaðið fyrir um það hjá Landhelgisgæslunni í fyrradag hvort halda ætti nýja leigusamningnum til streitu eða ekki. Jafnframt var spurt um hvað liði boðaðri yfirferð stofnunarinnar á nýlegum niðurstöðum flugslysanefndarinnar í Noregi. Svar hefur ekki borist. Hins vegar framsendi Georg Lárusson, forstjóri Landhelgisgæslunnar, Fréttablaðinu í gær til upplýsingar tölvupóst frá Höskuldi Ólafssyni, tæknistjóra stofnunarinnar, til framkvæmdateymis Gæslunnar.

„Vélin sem fórst í Suður-Kóreu er ekki H225 vél. Þetta er hervél MUH-1 sem er hönnuð og framleidd í Suður-Kóreu en gert í einhverju samstarfi við Airbus. Hefur ekkert að gera með framleiðslu H225 eða flugstarfsemi innan EASA. Ótrúlegar fullyrðingar og fréttaflutningur hjá Fréttablaðinu!“ segir í pósti Höskuldar.

Því var reyndar alls ekki haldið fram í Fréttablaðinu að um væri að ræða H225 Super Puma þyrlu í Suður-Kóreu. Þvert á móti kom einmitt skýrt fram að um hafi verið að ræða MUH-1 herþyrlu. Hins vegar var á það bent að þessar þyrlur eru með sams konar gírkassa frá Airbus.

Ekkert samráð mun hafa verið haft við flugmenn hjá Landhelgisgæslunni um leigu á umræddum þyrlum og eru þeir sagðir mjög hugsi yfir stöðunni. 


Tengdar fréttir

Enn hrapar þyrla með gírkassann frá Airbus

Fimm fórust þegar spaði losnaði af þyrlu í Suður-Kóreu í síðustu viku. Var með sams konar gírkassa og tvær þyrlur sem Landhelgisgæslan leigir. Flugslysanefnd í Noregi gagnrýndi búnaðinn stuttu eftir að gengið var frá leigunni til Íslands.

Bæta þarf hönnun Super Puma segir norsk rannsóknarnefnd

Rannsóknarnefnd flugslysa í Noregi segir Airbus ekki hafa gert nóg til að tryggja öryggi Super Puma þyrla af þeirri gerð sem hrapaði í apríl 2016.  Landhelgisgæslan á Íslandi, sem var að leigja tvær slíkar þyrlur á "tilboði aldarinnar“, skoðar niðurstöðuna á næstu viku. Framleiðandi þyrlanna segist hafa bætt öryggi þeirra.

Þáðu tilboð aldarinnar

Landhelgisgæslan telur sig hafa gengið að „tilboði aldarinnar“ með því að taka við tveimur þyrlum leigusala síns. Verkalýðsfélög í Noregi séu á bak við erfiða stöðu þyrlanna. Bandarísk fyrirtæki stefndu Airbus vegna galla í þyrlunum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.