Mannauðsstjóri deilibílaþjónustunnar Uber hefur sagt upp störfum eftir aðeins 18 mánuði hjá fyrirtækinu. Mannauðstjórinn fráfarandi, Liane Hornsey, tilkynnti um uppsögn sína í tölvupósti til starfsmanna í gær. Innri rannsókn hjá Uber, sem ráðist var í eftir nafnlausa ábendingu, leiddi í ljós að Hornsey hafði markvisst hunsað tilkynningar um kynþáttamismunun sem henni hefðu borist á því einu og hálfa ári sem hún starfaði hjá fyrirtækinu.

Hornsey hafði verið fyrirferðamikil í fjölmiðlum þar sem hún þótti standa sig vel í að svara fyrir orðróma um ásakanirnar. Fyrirtækið hefur átt í vök að verjast á undanförnum árum vegna reglulegra frétta af hvers kyns mismunun sem afhjúpuð hefur verið hjá Uber.

Uppsögn Horsney er sögð varpa enn frekara ljósi á þann vanda sem framkvæmdastjóri Uber, Dara Khosrowshahi, stendur frammi fyrir en hann hefur á síðustu misserum reynt að vinna bug á því „eitraða andrúmslofti“ sem bitnað hefur á starfseminni.

Í fyrrnefndum tölvupósti þakkaði framkvæmdastjórinn Hornsey fyrir vel unnin störf og hrósaði henni fyrir dugnað. Ekkert er þó minnst á ástæðu uppsagnarinnar í póstinum en haft er eftir Hornsey að hún hafi lengi íhugað að segja upp. Hún hefur ekki viljað tjá sig um málið við erlenda miðla.