Menning

Listafólk hefur lífgað upp á Skagaströnd í tíu ár

Gunnþóra Gunnarsdóttir skrifar
Á afmælissýningunni í Deiglunni eru verk eftir sjötíu og sjö fyrrverandi gestalistamenn í Nesi listamiðstöð.
Á afmælissýningunni í Deiglunni eru verk eftir sjötíu og sjö fyrrverandi gestalistamenn í Nesi listamiðstöð.

Sýning í Deiglunni á Akureyri nú um helgina er haldin í tilefni tíu ára afmælis Ness listamiðstöðvar á Skagaströnd og til að fagna tímamótunum hafa 77 fyrrverandi gestalistamenn gefið þangað verk.

„Listamiðstöðin er hér í miðjum bænum og hún hefur blómstrað alla tíð,“ lýsir Signý Richter sem býr á Skagaströnd og hefur verið í stjórn Ness frá upphafi. Hún segir Hrafnhildi Sigurðardóttur myndlistarkonu hafi komið miðstöðinni á laggirnar með stuðningi bæjar og Byggðastofnunar. 

Signý hefur verið í stjórn listamiðstöðvarinnar frá upphafi.

„Hingað koma oft tíu til fimmtán listamenn í hverjum mánuði og dvelja fjórar vikur. Þeir lífga upp á bæinn, sérstaklega þegar þeir eru með verkefni í skólanum sem krakkarnir taka þátt í. Í lok mánaðar geta allir skoðað hvað þeir hafa verið að gera, það er misjafnlega sýnilegt. 

Ein frönsk stúlka byrjaði að mála stór olíuverk, 2x2, ef ekki stærri þegar hún var hér, en hafði áður einbeitt sér að litlum, fíngerðum myndum. Þetta var 2009 og hún hefur verið að mála svona stór verk síðan. Ísraeli sem var vanur þvílíkri mannmergð labbaði hér upp á fjall og lá einn á bakinu í marga klukkutíma í rigningu. Fannst það yndislegt. Oft opnar þetta langt að komna listafólk líka augu okkar heimafólks fyrir fegurðinni hér í kring.“

Sýningin er opin milli klukkan 14 og 17 í Deiglunni, Listagili.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira