Körfubolti

Jabari Parker snýr aftur heim til Chicago

Arnar Geir Halldórsson skrifar
Jabari Parker
Jabari Parker vísir/getty

Jabari Parker er genginn til liðs við Chicago Bulls í NBA körfuboltanum en þessi 23 ára gamli framherji gerir tveggja ára samning við félagið. Parker er fæddur og uppalinn í Chicago og sló fyrst í gegn með Simeon Career skólanum frá Chicago þegar hann var í framhaldsskóla.

Þaðan hélt Parker í Duke háskólann þar sem hann lék aðeins eitt ár í háskólaboltanum áður en hann var valinn annar í nýliðavalinu árið 2014 af Milwaukee Bucks.

Ferill Parker hefur ekki náð þeim hæðum sem búist var við enn sem komið er og hafa meiðsli sett strik í reikninginn hjá þessum hæfileikaríka körfuboltamanni. Hann byrjaði ekki einn leik á síðustu leiktíð eftir að hafa snúið aftur á völlinn í febrúar, þá eftir tæplega árs fjarveru vegna meiðsla í kjölfar tveggja krossbandaslita.

Stuðningsmenn Bulls líta björtum augum á framtíðina í kjölfar komu Parker en liðið hefur á að skipa afar ungu og efnilegu liði þar sem þeir geta nú stillt upp heilu byrjunarliði sem inniheldur eingöngu leikmenn sem hafa verið valdir snemma í nýliðavalinu á undanförnum fjórum árum.

Kris Dunn (valinn númer 5 árið 2016), Zach Lavine (valinn númer 13 árið 2014), Jabari Parker (valinn númer 2 árið 2014), Lauri Markkanen (valinn númer 7 árið 2017) og Wendell Carter Jr. (valinn númer 7 árið 2018).



NBA


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.