Golf

Ólafía byrjaði vel í Wisconsin

Ástrós Ýr Eggertsdóttir skrifar
Ólafía Þórunn byrjar mjög vel í Wisconsin
Ólafía Þórunn byrjar mjög vel í Wisconsin víris/getty

Ólafía Þórunn er rétt utan við toppbaráttuna eftir flottan fyrsta hring á Thornberry Creek mótinu í golfi sem er hluti af LPGA mótaröðinni.

Ólafía var jöfn í áttunda sæti þegar aðeins tvær holur voru eftir en skolli á 17 holunni sá hana detta niður í 15. - 27. sæti.

Hún fór hringinn í dag á þremur höggum undir pari eftir sex fugla og þrjá skolla. Dagurinn byrjaði illa, með skolla á fyrstu holu. Hún var hins vegar fljót að ná högginu til baka og endaði fyrri níu holurnar á tveimur höggum undir pari.

Það kom skolli á 12. holu sem Ólafía fylgdi eftir með þremur fuglum á næstu fjórum holum og staðan orðin mjög góð fyrir íþróttamann ársins 2017. Eins og áður segir fékk hún svo skolla á næst síðustu holunni og paraði svo þá 18. og endaði á þremur höggum undir pari.

Þegar þessi frétt er skrifuð er Katherine Kirk í efsta sæti á átta höggum undir pari og Ólafía því ekki mörgum höggum frá toppbaráttunni. Enn eiga þó um 70 kylfingar eftir að fara af stað, Ólafía var á meðal þeirra fyrstu sem fóru út í morgun.

Haldi hún vel á spöðunum á morgun ætti Ólafía að fljúga í gegnum niðurskurðinn.

Útsending frá mótinu hefst klukkan 22:30 á Golfstöðinni.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira