Sport

Hestamenn fylla Víðidalinn um helgina

Tinni Sveinsson skrifar
Kristján Þór Júlíusson, sjávarútvegs- og landbúnaðarráðherra, Sigurbjörn Bárðarson knapi og Sigurður Ingi Jóhannsson, samgöngu- og sveitastjórnarráðherra.
Kristján Þór Júlíusson, sjávarútvegs- og landbúnaðarráðherra, Sigurbjörn Bárðarson knapi og Sigurður Ingi Jóhannsson, samgöngu- og sveitastjórnarráðherra. Vísir/Bjarni
Formleg setning 23. Landsmóts hestamanna fór fram í gærkvöldi í Víðidal í Reykjavík. Áskell Heiðar Ásgeirsson, framkvæmdastjóri mótsins, sagði í samtali við Vísi að á bilinu fimm til sex þúsund manns hafi verið viðstaddir setninguna.

Rjóminn af íslenska hrossastofninum er samankominn á landsmótinu þar sem um þúsund hross taka þátt. Keppt hefur i verið í flestum greinum frá því á sunnudaginn síðasta og lýkur mótinu á sunnudag klukkan 16.

Dagur B. Eggertsson borgarstjóri setti mótið í blíðskaparveðri. Hann sagði meðal annars að Reykjavík væri höfuðborg íslenska hestsins og hann væri stoltur af að vera Reykvíkingur þegar hann liti yfir hið glæsilega keppnissvæði í Víðidalnum.



Til að fylgjast með úrslitum nota mótsgestir nýtt íslenskt app, LH Kappa, og er það búið að raða sér á toppinn yfir vinsælustu öpp landsins í bæði App Store og Google Play.

Glæsileg dagskrá er í Víðidalnum alla helgina. Á föstudags – og laugardagskvöld er dansleikir þar sem fram koma Albatross með Sverri Bergmann, Röggu Gísla og Sölku Sól, Axel Ó & co., Helgi Björns og reiðmenn vindanna, Stebbi Jak og Andri, Sigvaldi Helgi, Grétar og Hebbi, Dísella Lár og Magni Ásgeirsson, sem jafnframt er tónlistarstjóri mótsins.

Hægt er að kynna sér dagskrá mótsins á vefnum landsmot.is.

Sunnudaginn 1. júlí verður frítt inn á svæðið og áhersla verður lögð á fjölskylduna. Þá fer fram keppni í barna- og unglingaflokki og einnig munu Jói P. og Króli og Leikhópurinn Lotta koma fram. Alla mótsdagana verður sérstakt leiksvæði fyrir börn opið.

Boðið verður upp á fræðslu um allt sem tengist íslenska hestinum á vegum verkefnisins Horses of Iceland. Meðal þess sem verður kynnt er; knapamerkjakerfið, líkamlegar mælingar á knöpum, járningar, ýmsar sýnikennslur frá knöpum Hrímnis, hestamiðstöðinni Sólvangi og Félags tamningamanna, rætt um fóðrun, fyrirlestur um val á hnökkum, greint frá meistararitgerð um skeiðgenið og sagt frá áhrifum skeiðgensins á ganghæfni íslenskra hrossa.

Kvöldfréttir Stöðvar 2 voru í beinni útsendingu frá Víðidalnum í gærkvöldi þar sem rætt var við Þórdísi Gylfadóttur mótsstjóra, Áskel Heiðar Ásgeirsson framkvæmdastjóra og Magna Ásgeirsson skemmtanastjóra.

Hér fyrir neðan er hægt að fletta myndasafni með fleiri myndum sem Bjarni Þór Sigurðsson tók fyrir Vísi.

Hjörtur Bergstað, formaður Fáks, Sindri Sigurgeirsson, formaður Bændasamtakanna og Dagur B. Eggertsson borgarstjóri.Vísir/Bjarni
Doug Smith, varaforseti FEIF og Gunnar Sturluson, forseti FEIFVísir/Bjarni
Fulltrúar ungu kynslóðarinnar í félagi tamningamanna voru fánaberar við setningu mótsins.Vísir/Bjarni
Dísella Lárusdóttir óperusöngkona söng þjóðsönginn og fleira fyrir mótsgesti.Vísir/Bjarni
Talið er að á bilinu fimm til sex þúsund manns hafi verið í Víðidal í gærkvöld.Vísir/Bjarni
Áslaug Arna Sigurbjörnsdóttir, varaformaður Sjálfstæðisflokksins, fór fyrir hópreið við setningu mótsins.Vísir/Bjarni
Telma Tómasson tók þátt í töltkeppni á Baron frá Bala.Vísir/Bjarni
Sigurður Vignir Matthíasson tók þátt í elsta flokki stóðhesta á Tindi frá Eylandi.Vísir/Bjarni



Fleiri fréttir

Sjá meira


×