Golf

Fugl á lokaholunni dugði ekki til og Ólafía úr leik

Ástrós Ýr Eggertsdóttir skrifar
Ólafía hefur átt erfitt uppdráttar á LPGA mótaröðinni það sem af er sumri
Ólafía hefur átt erfitt uppdráttar á LPGA mótaröðinni það sem af er sumri vísir/getty

Ólafía Þórunn Kristinsdóttir fór ekki í gegnum niðurskurðinn á Thornberry Creek mótinu í Wisconsin eftir rólegan annan hring í dag.

Ólafía spilaði vel á fyrsta hringnum og var ekki langt frá toppbaráttunni þegar hún kom í hús á þremur höggum undir pari. Skorið í mótinu er hins vegar mjög lágt og var Ólafía við niðurskurðinn þegar hún fór af stað í dag.

Skolli á fyrstu holu sá Ólafíu falla fyrir neðan niðurskurðinn. Hún paraði næstu fjórar holur áður en hún fékk fugl og vann höggið til baka. Skolli 17. holu, hennar áttundu, þýddi að hún lauk fyrri níu holunum á höggi yfir pari, samtals á tveimur höggum undir pari í mótinu.

Þegar Ólafía hafði lokið við fyrri níu holurnar var niðurskurðarlínan komin við fjögur högg undir parið og því ljóst að Ólafía þyrfti að spila vel á seinni níu til þess að komast í gegnum niðurskurðinn.

Ólafía fékk par á næstu fimm holum og möguleikinn á áframhaldandi keppni orðinn fjarlægur. Ástandið versnaði til muna með skolla á 6. holu en hún fékk fugl strax á 7. holu. Ólafía fékk par á 8. holunni og þurfti því örn á síðustu holunni, 9. holu, til þess að komast áfram.

Hún fékk hins vegar fugl, sem skilaði henni aftur á parið á öðrum hring en dugði ekki til og Ólafía úr leik.

Enn eiga nokkrir kylfingar eftir að ljúka leik í mótinu en það er nær enginn möguleiki á því að niðurskurðarlínan fari aftur á þrjú högg undir parið og Ólafía sleppi í gegn.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.