Innlent

Gul viðvörun enn í gildi

Sunna Kristín Hilmarsdóttir skrifar
Vindaspá Veðurstofunnar klukkan 18 í dag. Veðrið nær hámarki síðdegis.
Vindaspá Veðurstofunnar klukkan 18 í dag. Veðrið nær hámarki síðdegis. veðurstofa íslands

Gul viðvörun er enn í gildi hjá Veðurstofu Íslands vegna suðvestan storms sem gengur yfir landið í dag. Gildir viðvörunin fyrir Breiðafjörð, Vestfirði, Strandir og Norðurlan vestra og miðhálendið.

Í athugasemd veðurfræðings á vef Veðurstofunnar segir að búist sé við hvassri suðvestanátt með varasömum vindhviðum á þessum slóðum. Er ferðalöngum ráðlagt að kanna aðstæður áður en lagt er í hann og mögulega fresta för. Á þetta sérstaklega við um þá sem eru á ferð á farartækjum sem eru viðkvæm fyrir vindi eins og til dæmis húsbíla og hjólhýsi.

Í hugleiðingum veðurfræðings segir að óvenju hvasst verði í dag miðað við árstíma. Veðrið mun ná hámarki síðdegis og suðvestanáttinni munu fylgja rigningarskúrir nokkuð víða. Það verður þó áfram ágætis veður fyrir austan:

„Norðaustan- og austanlands er hins vegar þurr og nokkuð bjartur dagur í vændum með hita um 20 stig þegar best lætur. Í þurrum suðvestan belgingnum á þessum slóðum eru þó líkur á að vart verði við moldrok,“ segir í hugleiðingum veðurfræðings.

Á morgun er því síðan spáð að suðvestanáttin gefi verulega eftir en verði þó áfram þannig að vel finnst fyrir henni.

„Í stuttu máli sagt er áfram útlit fyrir suðlægar áttir út vikuna með vætu sunnan- og vestanlands, en lengst af þurrt og hlýtt á Norðaustur- og Austurlandi. Misskipting veðurgæða milli landssvæða heldur sem sagt áfram þessa vikuna.

Til að gefa íbúum á vestanverðu landinu vonarglætu, þá gefa langtímaspár vísbendinu um breytingu á veðurlagi eftir næstu helgi. Þá er möguleiki á að hlýir austanvindar blási á landinu sem í grófum dráttum þýðir að það þornar og hlýnar um landið vestanvert,“ segir í hugleiðingum veðurfræðings.

Veðurhorfur á landinu í dag og næstu daga:

Vaxandi suðvestanátt, 13-23 m/s um hádegi, hvassast norðvestantil á landinu og á miðhálendinu. Víða skúrir, en bjartviðri norðaustan- og austanlands.

Dregur úr vindi í kvöld og nótt, suðvestan 8-15 á morgun með vætu, en áfram þurrt og bjart um landið norðaustanvert.

Hiti 10 til 20 stig, hlýjast á Austurlandi.

Á miðvikudag:
Sunnan 5-10, en 10-15 um landið norðvestanvert. Dálítil væta á sunnan- og vestantil, annars víða bjartviðri. Hiti 10 til 20 stig, hlýjast norðaustanlands.

Á fimmtudag:
Suðvestan 3-10 og stöku skúrir, en skýjað með köflum á Norður- og Austurlandi. Hiti breytist lítið.

Á föstudag:
Gengur í suðaustan 8-15 m/s með rigningu, en þurrt um landið norðaustanvert fram á kvöld. Hiti 10 til 22 stig, hlýjast á Norðausturlandi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira